Almaty prokýratýrasy Botanıkalyq baqtaǵy baǵalardy arzandatty
Quzyrly organ botanıkalyq baqqa kirý aqysyn qalyptastyrý kezinde erekshe kúzetiletin tabıǵı terrıtorııalar týraly ereje jáne salyq zańnamasy buzylǵanyn anyqtady.
Buǵan deıin mektep oqýshylaryna kirý aqysy - 100 teńge, stýdentterge - 200 teńge, eresekterge - 350 teńge, kıno, telebaǵdarlama túsirýge - saǵatyna 5000 teńge, foto túsirýge - saǵatyna 3000 teńge, toı kólikteriniń kirýine - ár kólikke 1 myń teńge, ósimdikterdiń túrin anyqtaýǵa - 1 danaǵa 1200 teńge, ósimdikterdi kútý boıynsha keńes úshin saǵatyna 1500 teńge bolatyn.
Prokýrorlyq tekserýdiń arqasynda bul tarıfter tómendedi. Endi eresek adamdar 240 teńgemen baqqa kire alady. Kıno, vıdeo túsirilimge - 2400 tg, fototúsirilimge -1200 tg tólenedi.
Aıta ketý kerek, 28 maýsymda qalalyq ákimdikte Botanıkalyq baqty túrlendirý kontseptsııasynyń tujyrymdamasy talqylanǵan bolatyn. Atalǵan másele qoǵamdyq talqylaýǵa da usynyldy. Tujyrymdama qalalyqtar tarapynan maquldanǵan keıin 26 qyrkúıekte qoǵamdyq keńeste jobanyń eskızi jan-jaqty tanystyryldy. Buǵan deıin QR BǴM balansynda sanalyp kelgen botanıkalyq baqtyń ınfraqurylymdyq qamtýy Almaty ákimdiginiń menshigine ótti. Al baqtyń ǵylymı jaǵy QR BǴM qaraýynda qaldy.