Almaty polıtsııasynyń basshysy zorlyq kórgen áıelge qatysty pikir bildirdi
ALMATY. QazAqparat – Almaty polıtsııa departamentiniń basshysy Qanat Taımerdenov jalǵa alynǵan páterde jantúrshigerlik zorlyq kórgen áıeldiń isine qatysty pikir bildirdi, dep habarlaıdy QazAqparat tilshisi.
Jaqynda #NeMolchı qorynyń Facebook paraqshasynda 33 jastaǵy áıeldiń jaldamaly páterde zorlyq kórgeni jarııalanǵan bolatyn. Qylmys 26 qyrkúıekte bolǵan.
33 jastaǵy áıel 48 jastaǵy qurbysynyń shaqyrýymen onyń bolashaq kúıeýimen tanysýǵa kelgen. Úsheýi ishimdik iship, toılap otyrǵan kezde áıel kenetten esinen tanyp qalǵan.
Keıin belgili bolǵandaı, ony 2 saǵatqa jýyq ýaqyt zorlap, azaptap, bolǵan jaǵdaıdy túgel telefon kamerasyna túsirip alǵan. Esin jıǵan soń áıel qashyp ketken.
Qalalyq polıtsıa departamentiniń basshysy osy is boıynsha kúdikti kelesi kúni ustalǵanyn aıtty.
«Ol sot sanktsııasymen ýaqytsha oqshaýlaý ornyna qamaldy. Qazir barlyq saraptamalar taǵaıyndaldy. Saraptama nátıjesine qaraı qosymsha baptarmen is qozǵalyp, prokýratýraǵa jiberiledi. Eshkim qylmystyq jaýapkershilikten bosatylmaıdy. (48 jastaǵy) áıeldiń aıypty ekeni anyqtalsa, birden sol kúni sheshim qabyldanar edi. Qazir tergeý júrgizilip jatyr, betpe bet kezdesý uıymdastyrylyp, vıdeomaterıal jınaldy», - dedi Qanat Taımerdenov.
Onyń aıtýynsha, eki áıel de ishimdik ishken. Olar buryn Ózbekstanda birge turǵan. Ustalǵan adam da - Ózbekstan azamaty.
Foto: almaty.tv
