Almaty polıtsııasy júrginshini ólimshi etip qaǵyp, oqıǵa ornynan izin jasyrǵan júrgizýshini izdestirýde
ALMATY. QazAqparat-Almaty qalasynyń Ákimshilik polıtsııa basqarmasy júrginshini ólimshi etip qaǵyp ketken jáne oqıǵa ornynan iz jasyryp úlgergen belgisiz avtokóliktiń júrgizýshisin izdestirýde.
Bul týraly Almaty qalalyq ІІD baspasóz qyzmetinen habarlady.
Jan túrshigerlik oqıǵa 12 sáýir kúni, shamamen keshki saǵat 20:00-de bolǵan. Bekmahanov kóshesi boıymen batys baǵytta kele jatqan júrgizýshi Buryndaı kóshesimen qıylysar jerde Almaty oblysynyń 60 jastaǵy turǵynyn qaǵyp ketedi. Júrginshi jol-kólik oqıǵasy saldarynan birneshe saǵattan keıin №4-shi qalalyq klınıkalyq aýrýhanada kóz jumdy.
«Al áli anyqtalmaǵan avtokóliktiń júrgizýshisi oqıǵa ornynan iz jasyryp úlgergen. Degenmen, polıtsııa qyzmetkerleri kýágerlerdiń kómegimen onyń fotorobotyn jasady. Ol tez arada Almaty qalasy men oblysynyń barlyq polıtsııa bólimshelerine taratyldy», delingen málimdemede.
Almaty polıtsııasy osy jol-kólik oqıǵasyna kýá bolǵan júrgizýshi týraly tuspaldap bolsa da biletin azamattardy myna telefondarǵa habarlasýlaryn suraıdy: 254-47-80; 8-707-814-68-47; 8-707-837-78-13 jáne 8-701-707-36-96.
Habarlasýshylar týraly eshbir derektiń taratylmaıtyndyǵyna kepildik beriledi.
