Almaty polıtsııasy jolda qalǵan frantsýz otbasyna kómektesti
ALMATY. QazAqparat - Almatyda polıtseıler Frantsııalyq saıahatshylar Sılva men Vıvıan Brıannyń otbasyna kómektesti, dep habarlaıdy QazAqparat tilshisi.
Erli-zaıyptylar 4 balasymen birge Qazaqstanǵa saıahatqa shyqqan. Biraq olardyń kóligi buzylyp, turatyn jer tappaı turǵan kezde polıtseıler kómektesken.
Tártip saqshylary sheteldik týrısterge ýaqytsha turǵyn jaı taýyp berip, kólikterin jóndeýge kómektesti.
Bul otbasyny qazaqstandyqtar jaqsy biledi. Eki aı buryn Brıandar Shymkentte bolyp qaıtqan.
«Sılva men Vıvıan Brıan bul joly Ortalyq Azııa elderin aralaýǵa shyqqan. Shymkentten Almatyǵa kelgende olardyń kóliginiń motory buzylyp qalǵan. Bul dóńgelegi bar úlken úı bolǵandyqtan, kólikti jóndeý kóp aqshany talap etedi. Bul problemany estigen departament basshylyǵy Brıandar otbasyna barynsha kómek berýge tapsyrma berdi. Avtoortalyq otbasynyń kóligin jóndeýge jeńildikpen qyzmet kórsetti. Jóndeý jumystary uzaqqa sozylǵandyqtan, polıtsııa departamenti otbasyǵa ýaqytsha úı jaldaýǵa kómektesti», - dedi qalalyq PD týrıstik polıtsııa bóliminiń aǵa ınspektory Jeńisbek Shalbaev.
Otbasy polıtsııa qyzmetkerlerine alǵys bildirdi.
«Bizdiń mádenıetimiz ártúrli. Qazaqstandaǵy qonaqjaılylyqqa tántimin.Qıyn jaǵdaıǵa ushyraǵanda Almaty polıtsııasy kómektesti. Kóp rahmet», - dedi Sılva Brıan.
