Almaty polıtsııasy «Jibek joly» bazaryna reıdke shyqty
ALMATY. QazAqparat - Almaty polıtsııasy qoldy bolǵan zattardyń bazarlarda saýdaǵa túsýine jol bermeý úshin jedel-aldyn alý sharasyn ótkizdi, dep habarlaıdy QazAqparat tilshisi.
Alataý aýdanynda ornalasqan «Jibek joly» avtobólshek bazary aýmaǵynda QR zańyn buzǵan azamattardy, ásirese kóshi-qon salasyndaǵy tártipke baǵynbaǵandardy anyqtaý maqsatynda tártip saqshylary reıd júrgizdi.
«Reıdke ІІD jáne ІІB jeke quramynyń 100 qyzmetkeri atsalysty. Shara barysynda 97 avtobólshek satatyn núkte, 15 tehnıkalyq qyzmet kórsetý stansasy, QR ІІD bazasyndaǵy kúdikti degen 82 adam, 34 avtomobıl quraldary tekserilgen. Reıd kezinde QR ÁQB týraly kodekstiń 434, 440, 441, 449, 505, 517, 518, 519 baptary boıynsha 64 ákimshilik quqyqbuzýshylyq anyqtalǵan. Alataý aýdany ІІB-na 97 adam jetkizilse, onyń 34-i kóshi qon zańyn buzǵan. Qabyldaý bólimine qujatsyz júrgen 9 adam qamaldy»,-dedi qalalyq ІІD krımınaldy polıtsııa basqarmasy bastyǵy, polıtsııa podpolkovnıgi Esen Ysqaqov.
Budan bólek Almaty ІІD urlanǵan zattardy satqan nemese satyp alǵan azamattar QR QK 196 babyna sáıkes qylmystyq jaýapkershilikke tartylatynyn eskertedi.
