Almaty polıtsııasy jeńgetaılyqpen aınalysqan qylmystyq topty qolǵa túsirdi
ALMATY. 11 sáýir. QazAqparat /Ádilet Musahaev/ - Almaty polıtsııasy jeńgetaılyqpen aınalysqan qylmystyq topty qolǵa túsirdi. Tergeý barysynda belgili bolǵandaı, Túrkistan qalasyndaǵy pedagogıkalyq kolledjdiń stýdenti jeńgetaıdyń qolyna aqpan aıynyń ortasynda túsken.
Olar kórikti, ári symbatty qyzdy eki kún syrtynan baqylap júrip, retin taýyp, úıiniń janynda basyna qap kıgizip kólikpen urlap áketken.
«Aýdı» avtokóligi Almatyǵa qaraı jol tartqan, keıinen belgili bolǵandaı, ony qaladaǵy Farıda esimdi jeńil júrispen aınalysatyn áıelge ákelgen. Urlaǵan qyzdy Seıfýllın kóshesindegi qonaq úılerdiń biriniń jertólesine ákep qamaıdy. Olar qyzdy eriksiz seksýaldy qatynasqa májbúrlep, kúsh kórsetken. Biraq jábirlenýshi olarǵa baǵynbaı, árdaıym qarsylyq kórsetip otyrǵan. Múmkin, sondyqtan da bolar, jeńgetaı ony syrtqa jibermeı, árdaıym sol jertólede ustaǵan»,-deıdi Almaty qalasy ІІD Uıymdasqan qylmyspen kúres basqarmasynyń bastyǵy, polıtsııa polkovnıgi Valerıı Kozlov.
Urlanǵan qyz jóninde Almaty polıtsııasy ótken senbi kúni tańerteń málimet alǵan, arada eki-úsh saǵat ótkende arnaıy top qurylyp Jazıra qutqarylyp, al kúdiktiler qolǵa túsken.
«Bul iste kúdiktilerdiń basshysy 53 jastaǵy Farıda esimdi áıel jáne onyń 31 jastaǵy kómekshisi. Ekeýi de Ońtústik Qazaqstan obylysynyń turǵyndary. Qazir jábirlenýshi resmı aryz jazdy. Adam urlaǵandar qylmystyq jaýapkershilikke tartylady. Olardyń birden eki qylmysqa qatysy bar - adam urlaý jáne adamdy erkinsiz bostandyǵynan aıyrý. Belgili bolǵandaı, eki aı boıy jábirlenýshi kóshege shyqpaǵan, mazaq, qorlyqqa shydaǵan»,-dep atap ótti óz sózinde polkovnık V.Kozlov.
"Tekseris barysynda qyzdyń denesinde soqqynyń izderi anyqtalǵan. Psıhologııalyq zaqym alǵan jábirlenýshi emdeý kýrsynan ótýde", - deıdi tártip saqshylary.
