Almaty polıtsııasy jeltoqsanda 300-den astam avtokóliktiń tumshalaǵyshyn alyp tastady
ALMATY. QazAqparat- Almaty polıtsııasy jeltoqsan aıynyń ishinde 300-den astam avtokóliktiń tumshalaǵysh plenkasyn alyp tastady. Bul týraly búgin Almaty q. ІІD baspasóz qyzmeti habarlady.
Polıtsııa qyzmetkerleri bul sharany qalada jol qaýipsizdigine keri áser etetin óreskel zańsyzdyq áreketterdi anyqtaý maqsatynda júrgizilgen reıdter barysynda júzege asyrdy.
«Jol qozǵalysy erejesiniń qarapaıym normalaryn elemeý, túptep kelgende jol-kólik apattarynyń kóbeıýine ákep soǵady. Ókinishke qaraı, keıde qaıǵyly oqıǵalar oryn alyp jatady. Aǵymdaǵy aıdyń basynan beri jol-patrýldik polıtsııa qyzmetkerleri qala kóshelerinen memlekettik tirkeý nómiri joq 150 avtokólikti toqtatty. Sondaı-aq, taǵy 120 jaǵdaıda júrgizýshilerdiń júrgizýshi kýáligi jáne basqa da qujattary bolmaǵan. Odan basqa, avtokólikteriniń áınekterin arnaıy plenkamen tumshalap alǵan 300 júrgizýshi ákimshilik jaýapkershilikke tartyldy. Tek qana ótken bir táýlik ishinde dál osyndaı 53 derek tirkeldi. Tıisti sharany qoldaný nátıjesinde atalǵan quqyqbuzýshylarǵa qatysty ákimshilik is qozǵaldy», - dedi Almaty q. ІІD Ákimshilik polıtsııa basqarmasynyń bastyǵy, polıtsııa polkovnıgi Jandos Muratálıev.
Sonymen qatar, ol osy jeltoqsan aıynyń ishinde 112 mas júrgizýshiniń avtokólik quralyn basqarý quqyǵynan aıyrylý túrinde ákimshilik jaýapkershilikke tartylǵandyǵyn jetkizdi.
ІІD derekteri boıynsha, avtokólik júrgizýshileri negizinen jyldamdyq rejimin, jol belgileri men tańbalaryn jáne basqa da belgilengen normalardy eskere bermeıdi.
Esterińizge sala ketelik, 2015 jyldyń basynan beri jol qozǵalysy erejesin buzǵany úshin Almatyda 308 myńnan astam azamat ákimshilik jaýapkershilikke tartyldy. Olardyń ishinde 2 153 adam avtokóligin mas kúıinde basqarsa, 3 811 adamnyń avtokóligi memlekettik nómirsiz nemese ol jóndi oqylmaıtyn bolǵan. Al 3 929 adam avtokóliginiń terezelerin tumshalap alǵan.
