Almaty polıtsııasy jedel-járdem kóligin ótkizbegen júrgizýshini izdestirýde
ALMATY. QazAqparat - Almatyda sheteldik markaly kóliktiń júrgizýshisi jedel-járdem kóligine jol bermegen. Endi ol osy isi úshin mindetti túrde ákimshilik jaýapkershilikke tartylady. Bul týraly Almaty qalasy ІІD baspasóz hatshysy Saltanat Ázirbek málim etti, dep habarlaıdy QazAqparat tilshisi.
«Beınejazbadaǵy avtókólik júrgizýshisin taýyp, oǵan mindetti túrde ákimshilik aıyppul salynady. Bizdiń qyzmetkerler avtokólik ıesin anyqtaýda», - dedi Saltanat Ázirbek.
Eske sala ketsek, Instagram áleýmettik jelisindegi @kris_p_almaty paraqshasynda beınerolık jarııalanǵan bolatyn. Onda kólik rýlindegi áıel adam jedel-járdem kóliginiń ótýine kedergi jasap tur. Vıderolık 45 myń kórilim jınap, onda osy oqıǵaǵa baılanysty kóptegen synı pikirler jazylǵan.
Aıta ketý kerek, bul oqıǵaǵa baılanysty QR Ákimshilik Kodeksiniń 598 babyna sáıkes, (Arnaıy jaryq jáne dybys sıgnaldary iske qosylǵan jedel jáne arnaıy qyzmetter kólik quralynyń júrýine basymdyq bermeý) 7-den 15-ke deıingi AEK kóleminde aıyppul salý qarastyrylǵan.
