Almaty polıtsııasy jasóspirim balanyń ólimin tekserip jatyr
ALMATY. QazAqparat - Almaty polıtsııasy jattyǵý zalynda kóz jumǵan 15 jastaǵy balanyń ólimine qatysty tekserýdi bastady, dep habarlaıdy QazAqparat tilshisi.
Qalalyq Polıtsııa departamentiniń habarlaýynsha, bul oqys oqıǵany Almaly aýdandyq polıtsııa basqarmasynyń mamandary tekserip jatyr.
«Balanyń naqty neden qaıtys bolǵanyn anyqtaý úshin sot medıtsınalyq saraptama taǵaıyndaldy», - dedi polıtsııadan.
Aıta ketý kerek, qaıǵyly oqıǵa búgin Almatydaǵy jattyǵý zaldarynyń birinde bolǵan.
Qaıǵyly oqıǵa týraly psıhıatr, dáriger Jibek Joldasova Facebook-tegi paraqshasynda jazdy.
Qalalyq Qoǵamdyq densaýlyqty saqtaý basqarmasynyń habarlaýynsha, bala jedel járdem kelgenshe jan tásilim etken.
