Almaty polıtsııasy jappaı tártipsizdik kezinde qoldanylǵan qarý-jaraqty kórsetti
Almaty qalalyq polıtsııa departamentiniń málimetinshe, jedel aldyn alý sharasy barysynda Almaty qalasy men Almaty, Jambyl oblystarynda 400-den astam qarý tárkilengen.
Onyń 152-si bıylǵy qańtar aıynyń basynda bolǵan jappaı tártipsizdik kezinde qarý-jaraq dúkenderinen urlanǵan.
«Mamandandyrylǵan saýda oryndarynan barlyǵy 1 400-den astam atys qarýy urlanǵan. Sonymen qatar, zańsyz aınalymnan tárkilengen qarýdyń basym bóliginiń menshik quqyǵy áli anyqtalmaǵanyn, olardy qaskóıler qylmystyq jolmen alǵanyn aıta ketken jón», – deıdi Almaty qalalyq PD ákimshilik polıtsııa basqarmasynyń bastyǵy Nurlan Amanbek.
Aıta keteıik, osy kúnderi shaharda krımınogendik jaǵdaıdy jaqsartýǵa, sondaı-aq zańsyz aınalymnan, onyń ishinde belgili qańtar oqıǵasy kezinde qylmystyq quramdardyń menshigine aınalǵan qarýdy tárkileýge baǵyttalǵan «Qarý» jedel aldyn alý is-sharasy júrgizilip jatyr.
«Sondaı-aq, qylmystyq jaýapkershilikten bosatatyn, qarýdy óz erkimen tapsyrý naýqanyna nazar aýdarý qajet. Ol jalǵasyp jatyr»,- dedi polıtsııa ókili.
