Almaty polıtsııasy jalǵan nómir taqqan kólikterdi anyqtaý úshin reıdke shyqty
ALMATY. QazAqparat– A lmaty qalasynyń polıtseıleri jalǵan nómir taqqan jáne qozǵaltqyshynyń daýysy qatty shyǵatyn kólikterdi anyqtaý boıynsha reıd ótkizip jatyr, dep habarlaıdy QazAqparat tilshisi.
Almaty polıtsııasy jol qozǵalysy erejelerin óreskel buzýshylardy anyqtaý boıynsha kúsheıtilgen rejımde jumys istep jatyr.
«Osy kúnderi qalada reıd júrip jatyr. Patrýldik polıtsııa men mamandandyrylǵan batalonnyń jeke quramy jalǵan nómirlik belgilermen júrgen, memlekettik tirkeý nómirleri joq, terezelerin qarańǵylaǵan, sondaı-aq kólikterdi zańsyz qaıta jabdyqtaǵandardy anyqtap, ustap jatyr. Sonymen qatar kólik quraldaryn mas kúıinde basqarý faktilerine erekshe nazar aýdarylýda. Júrgizýshilerdiń arasynda jol qozǵalysyna qatysýshylardyń ómiri men densaýlyǵyna qaýip tóndiretinder áli de azaıar emes», – dedi Almaty qalalyq Polıtsııa departamenti bastyǵynyń birinshi orynbasary Nurlan Almasbekov.
Onyń aıtýynsha, táritp saqshylary ótken táýlikte qala joldarynda mas kúıinde kólik júrgizgen bes júrgizýshi ustady. Olardyń ekeýi buǵan deıin kólik basqarý quqyǵynan aıyrylsa da taǵy mas kúıinde kólik tizginine qaıta otyrǵan.
« Bir júrgizýshi jalǵan nómirlik belgi qoldanǵany úshin jaýapqa tartyldy. Sonymen qatar ótken táýlikte avtokólik terezelerin qarańǵylaýdyń 18 faktisi, avtokólik quraldaryn qujatsyz júrgizýdiń 23 faktisi, apattyq jaǵdaı týyndatýdyń 4 faktisi, qarsy jolaqqa shyǵyp ketýdiń 2 faktisi jáne t.b. quqyq buzýshylyqtar anyqtalǵan»,– dep atap ótti Nurlan Almasbekov.
