Almaty polıtsııasy zańsyz páter usynýdy retteý jumystaryn júrgizdi
ALMATY. Shildeniń 29-y. QazAqparat /Erbol Turymbetov/ - Almaty qalasynyń Seıfýllın jáne Abylaı han dańǵyldaryndaǵy páter jaldamalaryn retteý jumystary júrgizildi,
dep habarlaıdy Almaty qalasy ІІD baspasóz qyzmeti.
Jedel-profılaktıkalyq shara qalanyń ishinara turaqtylyǵyn saqtaý men quqyqbuzýshylyqtar men qylmysqa jol bermeý maqsatynda ótkizildi. Qazir qalanyń ortalyǵyndaǵy eki dańǵyl qatań baqylaýǵa alynǵan.
«Ózderin «makler» deıtin páter usynýshylar tutynýshylarǵa anaıy túrde jeńil júristi qyzdardy usynýǵa kóshken. Bul jaǵdaı jezóksheliktiń jáne basqa da qylmystardyń qanat jaıýyna ákep soǵýda. Sondyqtan, osyndaı jónsizdikterge jol bermes úshin árdaıym turaqty túrde profılaktıkalyq sharalar júrgizip otyramyz», dedi Almaty qalalyq ІІD-niń qoǵamdyq qaýipsizdik basqarmasynyń bastyǵy, polkovnık Nurlan Almasbekov.
Júrgizilgen jumystardyń alǵashqy 3 kúndik qorytyndysy boıynsha, Almaly aýdandyq ІІB-na Abylaı han dańǵyly boıynan «páter usynýshy» 250 azamat kelip túsken. Olardyń ishinde 8 adam el aýmaǵynda tirkeýsiz jáne qujatsyz turyp jatqandyǵy úshin, 9 adam turǵyn úı tártibin buzǵandyǵy úshin jáne 5-eýi jol erejesin óreskel buzǵandyǵy úshin ákimshilik jaýapqa tartylýda.
«Olardyń ishinde biren-sarany ǵana osy qyzmeti úshin arnaıy patentke ıe. Qalǵandary salyq tóleýden jasyrynyp júrgen jaldamalylar. Zańsyz kásipkerlikpen aınalysýshylar týraly jınalǵan barlyq málimetter sheshim shyǵarylý úshin Almaly aýdandyq salyq komıtetine jiberildi. Dál osyndaı jaǵdaı Seıfýllın dańǵylyna da tán. Onda da bir kúnniń ishinde 23 adam ustalǵan. Olardyń 17-si kóshede turyp jumys izdeýshiler bolsa, 8-i qujatsyz bolyp shyqty», deıdi polıtsııa polkovnıgi. Sonymen qatar, ol ondaı azamattar quqyq buzýshylyqtarymen qoımaı, ózderine jaqyn kórshiles turǵyndardyń da mazasyn alatynyn aıta kele, bul jaǵdaıda senim telefonyna dereý habarlasý kerektigin atap ótti.
