Almaty polıtsııasy zańsyz aınalymǵa túsken iri mólsherdegi geroın tárkiledi
ALMATY. Shildeniń 3-i. QazAqparat - Almatyda zańsyz aınalymǵa túsken kezekti iri mólsherdegi esirtki tárkilendi.
Jetisý aýdanynyń 22 jastaǵy turǵynynan 200 gramnan asa geroın tabyldy, dep habarlaıdy qalalyq ishki ister departamentiniń baspasóz qyzmeti.
Jas jigit Almatynyń bir kóshesinde polıtsııa qyzmetkerleriniń kózine túsken. «Onyń bireýmen kezdesý belgilegeni anyq. Ol ózin óte kúdikti ustady, jan-jaǵyna jaltaqtap, jıi-jıi saǵatyna qarap, ashýly júrdi. Ustalǵan sátinde untaq salynǵan túıinshekti laqtyryp jiberýge tyrysty. Keıin saraptama onyń 204 gramm geroın ekenin anyqtady», - dep túsindirdi qalanyń ishki ister departamenti esirtki bıznesine qarsy kúres basqarmasynyń bastyǵy, polıtsııa maıory Dennıs Loskýtov.
Qolǵa túsken azamat buryn esirtki zattaryn saqtap, ony taratqany úshin jazasyn ótegen.
