Almaty polıtsııasy úsh balanyń ólimin tergeýdi bastady
ALMATY. QazAqparat– Almaty polıtsııasy sýǵa batyp ketken oqýshylarǵa qatysty tergeýdi bastady, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, 2006 jyly týǵan Denıs Melnıkov, Vadım Sızov jáne Sabyr Dúıseǵalıevtiń ólimine qatysty tergeý amaldary júrgizilip jatyr. Balalardyń qaza bolý sebepterin anyqtaý maqsatynda sot-medıtsınalyq saraptama taǵaıyndaldy.
Úsh oqýshynyń úıden mektepke ketip, sodan qaıtyp oralmaǵany týraly aqparat Alataý aýdandyq polıtsııa basqarmasyna 12 qańtar kúni keshki saǵat toǵyzdar shamasynda tústi.
«Eń aldymen, krımınaldyq jáne ıývenaldy polıtsııa qyzmetkerleri, ýchaskelik ınspektorlar jedel-izdestirý sharalaryn uıymdastyrdy. Balalardy izdep tabýǵa «LLider.kz» eriktiler qozǵalysynyń ókilderi de atsalysty», - dep habarlady Almaty qalalyq PD baspasóz qyzmetinen.
Keıin, sý jaǵasynan jasóspirimderdiń arqa qorjyndary tabylyp, ol týraly qutqarýshylarǵa habarlanǵan.
«13 aqpan kúni tańǵy saǵat 04.31-de Almatynyń «112» pýltine Alataý aýdandyq polıtsııa bóliminen habar tústi. Polıtseıler Alataý aýdanyndaǵy «Terekti» yqshamaýdanynda sý qoımasynyń jaǵasynan izdestirilip jatqan úsh balanyń mektep sómkeleri tabylǵanyn aıtty. Oqıǵa ornyna QR ІІM TJK Respýblıkalyq shuǵyl-qutqarý jasaǵynyń súńgýirleri (7 adam, 1 tehnıka), sondaı-aq Almaty qalasynyń qutqarý qyzmeti (5 maman, 1 tehnıka) dereý attandyryldy», - dedi QR Іshki ister mınıstrligi Tótenshe jaǵdaılar komıtetiniń resmı ókili Nursultan Nurahmetov.
Súńgýirler úsh balanyń denelerin 13 aqpan kúni, tańǵy saǵat segizder shamasynda sýdan shyǵardy.
Oqýshylar óli kúıinde tabylǵany jóninde buǵan deıin qala ákimi Baqytjan Saǵyntaev habarlaǵan bolatyn.
