Almaty polıtsııasy týrıstke taksıde umytyp ketken beınekamerasyn taýyp berdi
ALMATY. QazAqparat- Almatyda Birikken Arab Ámirlikterinen kelgen týrıst Rashıd Abdýlkarım Muhammed Kárim Álblokı óziniń beınekamerasyn taksıde umytyp ketken. Polıtsııa qyzmetkerleri sheteldik azamattyń joǵalǵan zatyn taýyp berdi, dep habarlaıdy QazAqparat tilshisi.
BAÁ azamaty Bostandyq aýdanynda ornalasqan saýda-oıyn-saýyq ortalyǵyna barý úshin taksıge otyrǵan. Dittegen jerine jetken ol kólikten túsip qalǵan. Birneshe metr júrip ótken soń, er adam taksıde «Canon» beınekamerasyn tastap ketkenin esine túsiredi. Sheteldik azamat birden «102» -ge qońyraý shaldy. Kezekshi operator týrıstiń ótinishin shet tilinde qabyldap alǵan.
Bostandyq aýdandyq polıtsııa bóliminiń qyzmetkerleri, birneshe saǵattyń ishinde taksıdi anyqtap, beınekamerany ıesine qaıtaryp berdi. Óz kezeginde, Rashıd Abdýlkarım Muhammed Kárim Álblokı polıtsııaǵa kórsetken kómegi úshin alǵys aıtty.
«Meniń beınekameramdy tez arada taýyp bergen polıtsııaǵa óte rızamyn. Bul men úshin óte mańyzdy», - dedi sheteldik týrıst.
