Almaty polıtsııasy túngi ýaqytta avtobáıge uıymdastyratyn jastarǵa aıyppul saldy (FOTO)
ALMATY. QazAqparat - Almaty polıtsııasy túngi ýaqytta avtobáıgege shyǵatyn jastardy ákimshilik jaýapkershilikke tartty, dep habarlady qalalyq ІІD baspasóz qyzmeti.
Polıtsııanyń aıtýynsha, «túngi shýmaherler» eski alańda, Tóle bı men Abylaı han, Áıteke bı, Panfılov kósheleriniń qıylysynda jınalǵandy jaqsy kóredi.
Jastardyń dýmandy otyrysy jaqyn mańdaǵy turǵyndardyń mazasyn ábden alǵan. Jaz bastalysymen qala turǵyndarynan júzdegen shaǵym túsip úlgergen.
«Jastar mýzykany bar daýsyna qoıyp, karta oınaıdy. Olardyń dýmandy otyrysy qoǵamdyq tártip pen qala tazalyǵyna nuqsan keltiredi. Ásirese, kórshi úılerdiń turǵyndary tynysh uıyqtaýdan qalǵan. Olardyń kóbi úlken kisiler men sábıler», - dedi qalalyq ІІD ákimshilik polıtsııa basqarmasynyń basshysy Nurlan Almasbekov.
Tártip saqshylary bul aımaqty únemi baqylaýda ustaıdy. Apta saıyn bul jerde reıd júrgizilip turady.
Astana alańynda túngi saǵat 22.00-den tańǵy saǵat 6.00-ge deıin kólik qoıýǵa ruqsat joq. Osy erejeni buzǵan 4 júrgizýshige qarsy ákimshilik hattama toltyryldy.
