Almaty polıtsııasy talaı jurtty san soqtyrǵan kúdiktilerdi qolǵa túsirdi
ALMATY. QazAqparat - Almaty polıtsııasy ózbekstandyq azamat basqarǵan alaıaqtar tobyndaǵy kúdiktilerdi qolǵa túsirdi. Bul týraly búgin Almaty qalasy ІІD baspasóz qyzmetinen habarlady.
Kúdikti retinde ustalǵan Ózbekstan azamaty men jergilikti azamatsha, tergeý barysynda anyqtalǵanyndaı, bir emes birneshe qylmystyq isterge barǵan.
«Olar aldymen aqshaǵa muqtaj adamdardy izdeıtin bolǵan. Ásirese, kúdiktilerdiń toryna óz bıznesin damytýǵa qarjy izdegen kásipkerler túsip otyrǵan. Qaskúnemder aldymen olarǵa ózderin nesıe berýmen aınalysatyn myqty qarjylyq kompanııanyń ókilderi retinde tanystyryp, basqa bankterge qaraǵanda az mólsherlememen nesıe bere alatyndyqtaryn aıtyp sendirgen. Sotqa deıingi tergeý sharalary barysynda anyqtalǵanyndaı, nesıe berýshige kepilge eshqandaı múlik kerek bolmaǵan. Biraq, kelissózder barysynda kúdiktiler óz klıentterin alǵashqy jarna tóleýge kóndirip otyrǵan. Mysaly, olar Almaty irgesinde qus fabrıkasyn ashqysy kelgen áıelden alǵashqy jarna retinde 35 myń AQSh dollaryn talap etken. Keıin, nesıe alý máselesi sheshilgen soń, kúdiktiler oǵan 5 mıllıon teńgege kóleminde qaryz berýge ýáde etken. Sóıtip, bul áıelmen qatar basqa da jábirlenýshiler alaıaqtardyń talaptaryn buljytpaı oryndaǵan», - dedi óz sózinde Almaty qalasy Áýezov aýdandyq ІІB basqarmasynyń bastyǵy, polıtsııa polkovnıgi Baqyt Qasabekov.
Aýdandyq polıtsııa basqarmasynyń deregi boıynsha, qazir osy bólim tergeýshileriniń óndirisinde osy alaıaqtardyń qurbany bolǵan 10 azamattyń aryzy jatyr.
Sóıtse, bul qaskúnemder klıentterin sendirý úshin ózderiniń tólem qabilettiligin jáne iri kólemde nesıe bere alatyndaı múmkindigi bar ekendikterin rastaıtyn qarjylyq qujattardyń blankilerin paıdalanǵan. Ókinishke qaraı, aldanǵan adamdardyń eshbiri ózin saqtandyrý maqsatynda kúdiktiler usynǵan aqparattyń ras-ótirigin teksermegen.
«Bizdiń derekter boıynsha, bul alaıaqtyq jelini «A» esimdi Ózbekstan azamaty uıymdastyrǵan. Ol jergilikti turǵyndar arasynan ózine kómekshiler tapqan. Al olar áleýetti klıentter izdep tabýmen aınalysqan. Eger tergeý barysynda bul qylmystarǵa basqa da adamdardyń qatysy bar ekendigi anyqtalsa, olar mindetti túrde ustalyp, qylmystyq jaýapkershilikke tartylady. Al eki kúdikti tutqyndaldy. Aldaǵy ýaqytta olardyń elimizde oryn alǵan basqa da qylmystarǵa qatystylyǵy tekseriletin bolady. Jańa ǵana Almaty oblysynyń birneshe turǵynynyń osy kúdiktilerdiń qurbany bolǵandyqtary belgili boldy. Olar endi polıtsııaǵa aryz bermekshi», - dedi polkovnık Qasabekov.
Osyǵan baılanysty, Almaty qalasy Áýezov aýdandyq ІІB basshylyǵy qala turǵyndaryn kúdiktilerdiń túrine zer salyp qaraýǵa jáne tanyǵan jaǵdaıda 298-53-00 jáne 298-53-01 telefondaryna habarlasýǵa shaqyrady.
