Almaty polıtsııasy seksýaldyq quldyqtan qashyp shyqqan qyzǵa qatysty túsinikteme berdi
ALMATY: QazAqparat - Almaty polıtsııasy seksýaldyq quldyqtan qashyp shyqqan qyzǵa qatysty túsinikteme berdi, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, 6-mamyrda keshki 18:00-der shamasynda 29 jastaǵy áıel Súıinbaı kóshesinde aǵylǵan kólikterdiń biriniń astyna túsip qalǵan.
«Áıel ózin bireýler zańsyz qamap, seksýaldyq qyzmet kórsetýge májbúrlegenin aıtqan. Onyń aryzy qalalyq ІІD qyzmetkerlerimen QR QK 308 baby boıynsha sotqa deıingi tergeý isi reestrine tirkeldi. Kúdikti tulǵalar bólimshege jetkizildi. Polıtsııa qyzmetkerleri atalǵan derekke qatysty tekserý jumystaryna kiristi. Bul azamatsha 2009 jyldan beri qalalyq Uıymdasqan qylmysqa qarsy kúres basqarmasynda esepte tur. Munyń aldynda da bul azamatsha jynystyq qyzmet kórsetkeni úshin birneshe ret bólimshege jetkizilgen bolatyn», - dedi qalalyq polıtsııanyń baspasóz qyzmeti.
Aıta ketý kerek, atalǵan oqıǵanyń vıdeosy Feısbýk jelisin biraz dúrliktirgen bolatyn.
Oqıǵa kýágerleriniń aıtýynsha, áıel adam kóliktiń astyna túsken soń jaraqatyna qaramastan bazarǵa qashyp kirgen. Áıeldiń artynan birneshe adam qýyp kelgen. Qoryqqan áıel bazar satýshylary men satyp alýshylarynan jalynyp kómek suraı bastaıdy.
Sol sátte jınalǵan qalyń kópshilik áıeldi qýǵynshylardan qorǵap qalǵan.
Atalǵan vıdeo Feısbýk jelisi qoldanýshylarynyń narazylyǵyn týdyrdy. Kópshilik polıtsııadan atalǵan qylmysqa kinási barlardy jazaǵa tartýdy talap etýde.
