Almaty polıtsııasy páter jaldap turatyn turǵyndardy tekserip shyqpaq
ALMATY. QazAqparat - Almaty polıtsııasy qalada páter jaldap turyp jatqan azamattardy tekserýdi kúsheıtpek. Bul týraly Almaty ákimdiginde ótken qoǵamdyq keńes músheleri men ІІD qyzmetkerleriniń otyrysynda ІІD basshysy Serik Kúdebaev aıtty, dep habarlaıdy QazAqparat tilshisi.
Polıtsııa endi páter jaldap turatyn adamdardyń úıin jıi tekserip turatyn boldy. Júrgizilgen taldaýlarǵa sáıkes, bolǵan qylmystardyń 31 paıyzyn syrttan kelgender jasaıdy eken.
Qylmystyq ahýaldy baqylaýda ustaý maqsatynda páter jaldaýshylar endi keshendi ári josparly túrde tekserilip turady. Onyń ishinde sheteldikter turatyn jataqhanalar, qonaq úılerge de polıtsııa jıi bas suǵyp turmaq.
Sonymen qatar, onyń aıtýynsha, jyl basynan beri 103 myń quqyq buzýshyǵa 637 mln teńge aıyppul salynǵan.
ІІD basshysy Serik Kúdebaevtyń sózinshe, ІІD basty mindeti - polıtseıler arasyndaǵy qylmysty azaıtý bolyp otyr.
«2017 jyly 457 qyzmetker jumystan qýylǵan. Olardyń 10 paıyzy sybaılas jemqorlyq boıynsha aıyptalsa, 1 833 qyzmetker - tártiptik, 32 qyzmetker - qylmystyq jaýapkershilikke tartylǵan», - dedi S.Kúdebaev.
Sondaı-aq, bıyl Almaty ІІD shtattyq birlikti kóbeıtpek. ІІD basshysynyń aıtýynsha, Alataý jáne Naýryzbaı aýdanynyń paıda bolýyna baılanysty shtattyq birlikti kóbeıtý josparlanyp otyr.
