Almaty polıtsııasy órttiń aldyn alý úshin Kóktóbe bókterin qaraýyldap júr
ALMATY. QazAqparat - Almatyda Jergilikti polıtsııa qyzmeti TJD qyzmetkerlerimen birige otyryp Kóktóbe bókterin qaraýyldaýǵa kiristi, dep habarlaıdy QazAqparat tilshisi.
Qalalyq TJD baspasóz qyzmeti habarlaǵandaı, bul sharalar taý bókterindegi qurǵaq shıdiń, dala órtiniń aldyn alý úshin jasalyp otyr.
Kún saıyn qaraýyldaýǵa Polıtsııa men TJD tarapynan 11 qyzmetker, 3 tehnıka jumyldyrylǵan.
Aıta ketý kerek, 11 tamyzda Kóktóbe bókterinde qurǵaq shı órtengen bolatyn. Ony sóndirýge birneshe tikushaq jumyldyryldy.
Oqıǵa bolǵan jerge kóp uzatpaı Almaty ákimi Baqytjan Saǵyntaev keldi.
Keıin arada birneshe mınýt ótken soń sol aımaqqa jaqyn jerde taǵy bir órt tutandy. Bul joly tilsiz jaý Dıvaev kóshesine jaqyn boldy.
Qyzyl jalyn 1000 sharshy metr aýmaqty jaramsyz etken. Sol jerden órt sóndirýshiler 1 adamnyń denesin taýyp aldy.
Búgin Medeý men Shymbulaqqa baratyn jolda taǵy da órt shyqty.
