Almaty polıtsııasy naýqas balanyń taksıde ketken rıýkzagyn taýyp berdi
ALMATY. QazAqparat - Almaty polıtsııasy naýqas balanyń joǵalǵan rıýkzagyn taýyp berdi, dep habarlaıdy QazAqparat tilshisi.
Búgin áleýmettik jelide Almaty-1 vokzalynan mingen balanyń rıýkzagy joǵalǵany týraly habarlama tarap edi.
Joǵalǵan sómkede balanyń aýrýhanaǵa jatýyna ruqsat beretin medıtsınalyq qujattar men otaǵa qajet plastına bolǵan.
Balanyń ákesi Tilendıev Bolotnıkov kóshesinde taksıden túsken kezde sómkeni kólikte qaldyryp ketken.
Olar polıtsııaǵa saǵat 11:35-te júgingen.
«Almaly aýdandyq ІІB qyzmetkerleri men krımınaldyq polıtsııa qyzmetkerleri jumyldyryldy. Jedel túrde Ákimshilik polıtsııa basqarmasynyń protsessıngtik ortalyǵy mamandarynyń qatysýymen ákeli-balaly mingen kólik tabyldy. Júrgizýshiniń ózi de bagajdaǵy rıýkzak jaıly umytyp ketken. Qazir er adam Jambyl oblysynan qalaǵa kele jatyr.
Aıta ketý kerek, joǵalǵan zattyń tez tabylýyna «Jol qozǵalysy qaýipsizdigi» avtomattandyrylǵan aqparattyq júıesiniń tıgizgen septigi mol boldy. Búginde bul júıede 600 kamera ornatylǵan. Osylaısha taksı júrgizýshisiniń júrgen baǵyty anyqtaldy», - dedi ІІD resmı ókili Saltanat Ázirbek.
