Almaty polıtsııasy mektepterde mamandandyrylǵan kúzet qyzmetin engizýdi usyndy
Departament usynǵan derekterge sáıkes, qaladaǵy 205 mekteptiń 16-synda ǵana arnaıy kúzet qurylymymen kelisimshart jasalǵan. Qalǵan mektepterde bul fýnktsııany qaraýyl men vahterler atqarady.
Kóbine egde jastaǵy kisiler túrli quqyqbuzýshylyqqa qarsylyq kórsetýge qaýqarsyz.
«Bilim mekemelerindegi oqýshylardyń qaýipsizdigi - búginde ózekti máselelerdiń biri. QR ІІM bıyl qańtarda orta bilim jáne mektepke deıingi bilim mekemelerindegi vıdeobaqylaý júıesine arnaıy standarttar men talaptar shyǵarǵan bolatyn. Bul talaptar QR BǴM tarapynan da bekitildi. Vıdeobaqylaý júıesi kabınetterdegi, mektepke jaqyn terrıtorııadaǵy ahýaldy tolyq baǵalaýǵa, adamdardyń sulbasy men bet-júzin ajyratýǵa múmkindik berýi tıis. Ókinishke qaraı, barlyq mektepterdegi baqylaý júıesi talapqa saı kele bermeıdi. Búginde Almatydaǵy 201 jalpy bilim beretin nysanda 2 858 kamera ornatylǵan. Ár mektepte orta eseppen 8 kamera ornatylǵan. Kóbine bul kameralar foıede tur. Syrttaǵy kameralar mektep mańynda ne bolyp jatqanyn tolyq kórsete almaıdy», - dedi jıynda Almaty qalalyq polıtsııa departamentiniń basshysy Serik Kúdebaev.
Aıta ketý kerek, Almatyda bilim basqarmasy Tarazdaǵy oqýshyny zorlaý dereginen soń mektepterdegi ájethana máselesin qolǵa alǵan bolatyn.
Basqarma basshysy Gúlnar Qojabergenova 1-1,5 jyl ishinde qaladaǵy 3 mekteptiń sanıtarlyq toraby ishke engiziletinin aıtyp, ýáde berdi.