Almaty polıtsııasy málimdeme jasady
ALMATY. QazAqparat - Almatynyń polıtsııa departamenti keshe keshkisin qala ishindegi qoǵamdyq tártipti buzý faktilerine qatysty málimdeme taratty, dep habarlaıdy QazAqparat tilshisi.
«Keshe, 2019 jyldyń 10 maýsymynda shamamen 18-00-den basap 2019 jylǵy 11 maýsym saǵat 02-00-ge deıin Almaty qalasynda birneshe top tulǵa qoǵamdyq tártiptiń buzylýyna jol berdi. Atalǵan quqyq buzýshylyqqa qatysqandardy polıtsııa ustady. Qazirgi ýaqytta atalǵan oqıǵalarǵa qatysty quqyq qorǵaý organdarynyń tarapynan tolyq quqyqtyq baǵa berilgen joq. Degenmen, polıtsııa qaýesetke jol bermeý jáne halyqqa senimdi aqparat jetkizý maqsatynda atalǵan derekterdi naqtylaıtyn birneshe faktini jarııa etedi», - delingen taratylǵan aqparatta.
Vedomstvo málimetinshe, birinshiden, 10 maýsym kúni saǵat 18:00-de «Alǵabas» shaǵyn aýdanynda, «Alataý» teatrynyń aldyna R.Zaıytovtyń úndeýimen zańsyz sherý ótkizý úshin bir top adam jınalǵan. Olar polıtsııanyń «tarańdar» degen talaptaryn elemeı, qarsylyq tanytqandary úshin ustaldy. Buǵan qosa olardyń keıbiri «Almaty Arena» aýdanynda joldardy japqan.
«R.Zaıytovpen áńgimelesý júrgizilgennen keıin ol úıine jiberildi. Degenmen, R.Zaıytovpen áńgimelesý júrip jatqan kezde Almaty qalalyq polıtsııa departamentiniń aldyna ony qoldaǵan bir top adam jınaldy. R.Zaıytov úıinen kelip, olardan úılerine taraýdy, eshqandaı zańsyz sharaǵa qatyspaýdy, arandatýshylyqqa ermeýdi ótindi. Jınalǵandar birneshe top bolyp, qala ishine tarap ketti. Biraq, olardyń biri jeke kóligimen Tóle bı men Abaı kóshelerinde qozǵalysqa bóget jasady. 3-4 mashına qatarlasyp lek túzep, dybystyq dabyldaryn qosyp, tómen jyldamdyqpen qozǵaldy. Olar qalypty qozǵalysqa kedergi keltirdi. Dál osy ýaqytta atalǵan kóshede bir top adam jol ústimen júrip, qozǵalysqa bóget jasap, apattyq jaǵdaı týyndatty. Adam qatty aıqaılap, ysqyrdy, ózderin barynsha dóreki ustady», - dedi departamentten.
Taratylǵan aqparatqa qaraǵanda, quqyq buzýshylar qandaı da bir talap qoımaǵan.
«Ekinshiden, zańsyz aktsııaǵa qatysýshylar birneshe qylmystyq áreketter jasady. Máselen, túngi bir jarymda Tóle bı men Ótegen batyr qıylysynda, «Saıran» avtobeketine qarsy jolda zańsyz aktsııaǵa qatysýshy kóligimen jol qozǵalysyn retteý qyzmetin atqaryp turǵan jol-patrýldik polıtsııa qyzmetkerin qaǵyp ketti. Dárigerler oǵan oń jaq tizesiniń jabyq synýy dıagnozyn qoıdy. Júrgizýshi qylmys ornynan boı tasalaǵanymen QR Qylmystyq kodeksiniń 345-babynda qarastyrylǵan belgiler boıynsha ustaldy», - dedi vedomstvodan.
Sonymen qatar Almaty qalasynyń Alataý aýdanynda keshki ýaqytta mas kúıdegi bir top adam polıtsııanyń qyzmettik kóligin zaqymdaǵan. Olar kólikke tas laqtyryp terezesin syndyrǵan. Quqyq buzýshylar ustalǵan. Atalǵan fakti QR QK 293-baby boıynsha sotqa deıingi tergeýdiń biryńǵaı tizilimine tirkelgen.
«Úshinshiden, keshki jáne túngi ýaqytta atalǵan quqyq buzýshylyqtarǵa qatysty polıtsııanyń koll-ortalyǵyna azamattardan 1 250 shaǵym túsken. Onyń 70 paıyzy túnde boldy. Halyq túngi ýaqyttaǵy shý men aıqaıdan shoshynǵan. Júrgizýshiler jol júrisi erejesiniń óreskel buzylýyna narazylyq tanytqan. Polıtsııa organdary zańsyz áreketterdi tyıý boıynsha tıisti sharalardy qabyldady. Quqyq buzýshylar ustaldy. Qazirgi ýaqytta Almatydaǵy ahýal tolyqtaı baqylaýda. Kólik pen barlyq qyzmetterdiń qalypty jumysy qamtamasyz etilgen. Kóshelerdegi qaýipsizdikti qamtamasyz etý boıynsha barlyq sharalar qabyldanǵan. Polıtsııa qoǵamdyq tártiptiń buzylýyna, kez kelgen quqyqqa qaıshy áreketke jol bermeıdi, azamattardyń ómiri men qaýipsizdigine tóngen qaterge zańǵa sáıkes qatań tyıym salynatyndyǵyn málimdeıdi. Qosymsha málimetter atqarapttar naqtylanýyna baılanysty BAQ-qa habarlanatyn bolady», - dep atap ótedi Almaty qalalyq polıtsııa departamentinen.
