Almaty polıtsııasy kúsheıtilgen rejimge kóshti
ALMATY. QazAqparat - Almatyda jalpy respýblıkalyq «Quqyq tártibi» jedel-profılaktıkalyq sharasy júrgizilip jatyr, dep habarlaıdy QazAqparat HAA tilshisi.
Atalǵan is-sharalar 6 naýryzǵa deıin jalǵasady, dep málim etti polıtsııa departamentiniń baspasóz qyzmetinde.
«Osy kúnderi Almaty polıtsııasy qyzmetteri men bólimsheleriniń jeke quramy kúsheıtilgen rejimge kóshti.
Aıta keteıik, ótken táýlikte qalada «izin sýytpaı» 61 qylmys jáne buryn istelgen 18 qylmys ashyldy. Onyń ishinde tonaý, buzaqylyq, esirtki zattaryn saýdalaý, bóten adamnyń múlkin urlaý, zorlaý, alaıaqtyq, zańsyz qarý saqtaý, kólik aıdap áketý bar. Sonymen qatar izdeý jarııalanǵan 5 adam ustaldy», - dep atap ótti Almaty polıtsııa departamenti bastyǵynyń orynbasary Іzbasar Bekturov.
Budan bólek, polıtsııanyń habarlaýynsha, quqyqbuzýshylyq jasaǵany úshin 1,4 myń adam ákimshilik jaýapkershilikke tartylǵan. Onyń ishindegi eń jıi kezdesetinderi - usaq buzaqylyq pen qoǵamdyq jerde spırttik ishimdikter ishý.
Aıta ketý kerek, bir kúnde jeke sektorda 78 zańsyz mıgrant tabylǵan. Onyń 24-i sot sheshimimen QR aýmaǵynan shyǵaryldy. Atqarylyp jatqan keshendi jumystardyń barlyǵy elimizdiń eń iri qalasyndaǵy krımınogendik ahýaldy jaqsartýǵa múmkindik beredi, dep atap ótti polıtsııada.
Avtory: Danııar Daýtalıev
