Almaty polıtsııasy qorǵanys kostıýmderimen qamtamasyz etildi
ALMATY. QazAqparat – Almaty polıtsııasy 300-ge jýyq qorǵanys kostıýmderin aldy, dep habarlaıdy QazAqparat tilshisi.
Almaty qalalyq PD baspasóz qyzmetiniń málimetinshe,bul kıimdi birinshi kezekte Almatynyń karantındi perımetri boıyndaǵy 27 baqylaý-ótkizý posttarynda turǵan polıtsııa qyzmetkerleri kıedi.
«Bul kostıýmderdi ІІM-niń tapsyrmasymen qylmystyq-atqarý júıesi mekemeleri daıyndady. Búgin bizde 280 jıyntyq bar, aldaǵy ýaqytta olardyń sanyn 350-ge jetkizemiz. Baqylaý-ótkizý posttarynda qyzmet etip júrgen Almaty garnızony men bólimsheleriniń qyzmetkerleri qorǵanys kıimderin kıdi. Kún saıyn olar azamattarmen tyǵyz baılanysta bolady, olardyń arasynda «qaýip tobyna» kiretin adamdar da bolýy múmkin. ıAǵnı ony juqtyrý qaýpi óte joǵary. Karantındik sharalar bastalǵan kezden bastap ishki tártipti saqtaýdy qamtamasyz etetin ishki ister organdarynyń qyzmetkerleri perımetrdiń aınalasynda da, qala ishinde de medıtsınalyq maskany, qolǵapty jáne antıseptıkalyq quraldardy qoldanyp júr. Polıtsııa barlyq qajettiliktermen tolyq qamtamasyz etilgen», – dedi Almaty qalalyq PD basshysy Qanat Taımerdenov.
Qalalyq polıtsııa basshysynyń aıtýynsha, Almatydaǵy karantındik is-sharalarǵa Polıtsııa departamentiniń jeke quramynan,Ulttyq ulan men qorǵanys mınıstrliginen alty myńǵa jýyq adam tartylǵan. 997 jaıaý patrýldeý baǵyttarynda 3 myńǵa jýyq adam qyzmet etedi.
