Almaty polıtsııasy kompıýterlik alaıaqtardyń qylmystyq tobyn áshkereledi
ALMATY. QazAqparat- Almaty polıtsııasynyń operatıvtik qyzmetkerleri zııandy, vırýstyq kompıýterlik baǵdarlamalardy qoldana otyryp, birqatar alaıaqtyq áreketter jasaǵan eki azamatty qolǵa túsirdi. Olar Almaty oblysy Talǵar qalasynyń turǵyndary bolyp shyqty. Bul týraly búgin Almaty qalalyq ІІD baspasóz qyzmetinen habarlady.
Ázirge olardyń medıtsına salasyndaǵy memlekettik kásiporyndardyń biriniń shotynan iri kólemde aqsha urlaýǵa qatysy barlyǵy dáleldendi.
«Bul jerde másele 20 mln teńge jaıynda bolyp otyr. Ony qaskúnemder ekinshi dárejedegi banktiń klıenti - respýblıkalyq memlekettik kásiporynnyń shotynan urlaǵan. Qylmyskerler ol úshin zııandy baǵdarlamany paıdalana otyryp, qylmystyq operatsııany qashyqtyqtan basqaryp otyryp jasaǵan.
Budan birneshe jyl buryn Qaraǵandy oblysynyń turǵyny basqarǵan qylmystyq topty áshkereleý barysynda solardyń da dál osyndaı ádisti paıdalanǵany anyqtalǵan edi.
Esterińizde bolsa, sol qylmyskerler iri kompanııalar men mekemelerdiń kompıýter júıesin vırýstyq baǵdarlamalar, zııandy habarlamalar jiberý arqyly qashyqtyqtan basqarý múmkindigine qol jetkizgen. Osylaısha, iri kólemdegi qarjyny qaltaǵa basqan. Bul uıymdasqan qylmystyq toptyń músheleri sottalyp, ár túrli merzimge bas bostandyqtarynan aıryldy», - dedi Almaty qalalyq ІІD Krımınaldyq polıtsııa basqarmasynyń bastyǵy, polıtsııa podpolkovnıgi Janbolat Zıadın.
Operatıvtik bólimdegiler bul alaıaqtyq áreketterge basqa da tulǵalardyń qatysy bar bolýy múmkin ekendigin joqqa shyǵarmaıdy. Kúdiktiler Qazaqstannyń basqa da aýmaqtarynda alaıaqtyq áreketter jasaǵan bolýy múmkin. Bul endi tergeý barysynda anyqtalatyn bolady.
