Almaty polıtsııasy qaza bolǵan qyzmetkerin aqtyq saparǵa shyǵaryp saldy
ALMATY. QazAqparat - Almatyda polıtseıler qaza bolǵan áriptesteri Jandos Nurǵazıevti aqtyq saparǵa shyǵaryp saldy. Jerleý Almaty oblysy Іle aýdany Jańa dáýir aýylynda ótti, dep habarlaıdy QazAqparat tilshisi.
«Bul barlyǵymyzdyń qabyrǵamyzdy qaıystyrar qaıǵy bolyp otyr. Jandosty jer qoınyna tapsyryp jatyrmyz. Onyń ómirinde aldyna qoıǵan maqsaty kóp edi. Bıyl ǵana qart ata-anasyn Almatyǵa alyp kelgen bolatyn», - dedi Saltanat Ázirbek.
Onyń aıtýynsha, marqumnyń artynda jary, eki qyzy qaldy. Qyrkúıekte otbasynda taǵy bir sábı dúnıege keletin edi.
Qaıǵyly sharaǵa qalalyq ІІD basshysy Serik Kúdebaevtan bastap barlyq ІІD qyzmetkerleri keldi.
Áriptesteriniń aıtýynsha, qaza bolǵan jigit ónerge jaqyn bolǵan.
«2001 jyly «Qazaqstan - meniń Otanym» baıqaýynyń, 2015 jyly QR ІІM uıymdastyrǵan «Máńgilik el bolamyz» baıqaýynyń laýreaty atandy. Kapıtan Nurǵazıev birneshe jyl boıy polıtsııanyń ımıdjin kóterý maqsatynda aqparattyq nasıhat tobyn basqaryp, búkil eldi aralap shyqqan. Jandostyń talanty OQO, SQO, Qyzylorda, Jambyl, Qostanaı oblystaryndaǵy ІІO áriptesterin tánti etti. Onyń qazasy barlyǵymyzdyń qabyrǵamyzdy qaıystyrdy...», - dedi ІІD kadrlyq jumys basqarmasynyń basshysy Oraz Joldasov.
Aıta ketý kerek, qaıǵyly oqıǵa 26 maýsymda boldy. Almatydan shyǵaberiste polıtsııa qyzmetkeri qyzmettik mindetin oryndaý kezinde qaza tapty. Polıtseıdi Almaty-Qapshaǵaı jolynyń úshinshi shaqyrymynda «Nura» ekopostynyń janynda qaǵyp ketti. Er adam alǵan jaraqatynan oqıǵa ornynda kóz jumdy. Polıtsııa kapıtany 1986 jyly týǵan Jandos Nurǵazıev Almaty ІІD jedel áreket etý jasaǵynda, ishki ister organynda 2009 jyldan bastap aǵa ınspektor bolyp qyzmet etti.
