Almaty polıtsııasy qara topyraqty jappaı urlaý faktisin anyqtady
ALMATY. QazAqparat - Almatyda qara topyraqty zańsyz áketýdiń 13 faktisi anyqtaldy, dep habarlaıdy QazAqparat tilshisi.
Jergilikti polıtsııa qyzmetkerleri men Almaty qalasynyń qala qurylysy basqarmasy ókilderi birigip qunarly jer qabatyn zańsyz alý faktilerin anyqtaý úshin jumys júrgizýde.
«Eki kúnniń ishinde 13 fakti anyqtaldy, 12 adam ákimshilik jaýapkershilikke tartyldy. Aıyppuldyń jalpy somasy 450 myń teńgeni qurady», - dedi Almaty qalalyq jergilikti polıtsııa qyzmetiniń basshysy Tórehan Isın.
Spıkerdiń aıtýynsha, epızodtardyń birin Naýryzbaı aýdanynyń aýmaǵynda polıtsııa anyqtaǵan. Beıtanys tulǵa jer ýchaskesiniń ıesiniń ruqsatynsyz qara topyraqty tıep áketpekshi bolǵan. Bostandyq aýdanynda da bireýler jerdiń qunarly qabatyn qazyp alǵan.
«Biz jer ýchaskeleriniń ıelerin taptyq. Olarmen múlikti qorǵaý taqyrybynda áńgimelestik. Qazir bul jerler kúzetke alyndy. Aınalasy qorshalyp, shlagbaýym ornatyldy. Bul óte mańyzdy sharalar. Aıtpaqshy, ákimshilik polıtsııanyń mamandandyrylǵan batalon qyzmetkerleri, sonymen qatar jol-patrýldik polıtsııa qyzmetkerleri qunarly topyraqty zańsyz qazyp alý faktilerin anyqtaý jumystaryna belsendi atsalysyp jatyr. Olar qara topyraq tıegen kólikterdi nazardan tys qaldyrmaıdy», - dep qorytyndylady Tórehan Isın.
Sonymen qatar, ol joǵaryda atalǵan faktiler anyqtalsa, QR Ákimshilik quqyq buzýshylyq kodeksiniń 505-baby boıynsha ákimshilik is qozǵalatynyn atap ótti.
Buǵan deıin, qalada qara topyraqty urlaý faktileri anyqtalǵan bolatyn.
