Almaty polıtsııasy qara topyraqty urlaý faktisi boıynsha sotqa deıingi tergeýdi bastady
Almaty qalasynyń mamandandyrylǵan tabıǵat qorǵaý prokýratýrasy ýákiletti organdarmen birlesip qorshaǵan ortany qorǵaý jónindegi aldyn alý jumystary barysynda jer topyraǵynyń qunarly qabatynyń baqylaýsyz aınalymy faktilerin anyqtady.
«Alataý, Bostandyq, Jetisý, Medeý, Naýryzbaı jáne Túrksib aýdandarynyń aýmaǵynda belgisiz tulǵalar ruqsat qujattarynsyz qara topyraq, topyraq jáne ballast óndirý jumystaryn júrgizdi. Atalǵan faktiler boıynsha qalalyq Polıtsııa departamenti 2021 jylǵy 30 sáýirde Qazaqstan Respýblıkasy Qylmystyq kodeksiniń 188-babynyń 2-bóligi (urlyq) boıynsha sotqa deıingi tergeýdi bastady»,-dep habarlady qalalyq prokýratýradan.
Zańsyz óndirilgen topyraq negizinen qurylys jumystary úshin shıkizat retinde paıdalanylady.
Qazirgi ýaqytta barlyq qatysy bar tulǵalardy anyqtaý boıynsha qajetti is-sharalar júrgizilýde.