Almaty polıtsııasy qańtar qyrǵyny kýágerleri men jábirlenýshilerin izdep jatyr

ALMATY. QazAqparat – Almatyda qylmystyq top osy jyldyń 5-6 qańtary kúnderi qala kóshelerinde dene kúshin qoldanyp, azamattardy zańsyz tutqyndap, uryp-soqqan, dep habarlaıdy QazAqparat tilshisi.

Tergeý barysynda anyqtalǵandaı, qylmystyq top azamattardy erkinen tys «Qazaqstan» qonaq úıindegi «BallRoom» meıramhanasy men «Esentai Tower» bıznes ortalyǵynyń kólik turaǵynda ustap otyrǵan. Ustalǵandardyń arasynda alǵan jaraqattarynan kóz jumǵan adamdar da bar.

«Zardap shekkenderdiń kópshiligi anyqtalyp, tergeý amaldary júrgizildi. Alaıda, bolǵan oqıǵalardyń tolyq kórinisin anyqtaý úshin tergeýmen anyqtalmaǵan kýágerler men jábirlenýshilerdiń aıǵaqtary qajet. Azamattyq boryshyn óteýge shaqyra otyryp, kórsetilgen qylmystyq áreketterden zardap shekken, sondaı-aq, osy oqıǵalardyń kýágeri bolǵandardyń barlyǵyn Jeltoqsan kóshesi, 189 mekenjaıy boıynsha Almaty qalasy prokýratýrasynyń ǵımaratyna kelip, bar bilgenderin tergeý-jedel tobyna habarlaýlaryn suraımyz. Baılanys telefondar: 8-775-888-03-65; 8-775-644-95-96», - delinedi qalalyq polıtsııa departamenti taratqan habarlamada.

Eske salaıyq, qańtar oqıǵasy kezinde Almatyda polıtsııa ǵımaratyna shabýyl jasaǵandardyń biri ustalǵan jáne Prezıdent qańtar oqıǵasynyń tergeý barysyn únemi jarııalap otyrýdy tapsyrǵan bolatyn.