Almaty polıtsııasy kámelet jasyna tolmaǵan jasóspirimder kabınetin ashty
ALMATY. QazAqparat - Almaty qalasy Bostandyq aýdany polıtsııa basqarmasynda kámeletke tolmaǵan balalarǵa arnalǵan tergeý kabıneti ashyldy, dep habarlaıdy QazAqparat tilshisi.
Bul kabınette zorlyq kórgen jáne qylmys kýágeri bolǵan balalardan suraq-jaýap alynady.
«Arnaıy kabınet tergeýshi men balalar psıhologyna arnalǵan jumys oryndarymen jabdyqtalǵan. Osynyń bári bolashaqta balalardyń tolyqqandy aqparat berýine múmkindik beredi», - dedi qalalyq Polıtsııa departamenti basshysynyń orynbasary Sanjar Ádilov.
Pılottyq joba «Detı pod zaşıtoı» qoǵamdyq qory men azamattyq qoǵamdastyqtyń qoldaýymen júzege asty.
Qoǵam qaıratkeri Sandýǵash Dúısenovanyń aıtýynsha, jobanyń basty maqsaty - jábirlengen balalardyń psıhıkasyn zaqymdamaı, olarǵa qolaıly jaǵdaı jasaı otyryp jaýap alý.
«Zorlyq kórgen balaǵa qylmyskermen qaıta kezdesý óte qıynǵa soǵady. Bul jasóspirimniń jan dúnıesine jaǵymsyz áser qaldyratyny sózsiz. Sondyqtan, balanyń psıhıkasyn zaqymdamas úshin tergeý júrgiziletin oryn óte mańyzdy», - dedi S.Dúısenova.
Polıtsııa departamentiniń málimetinshe, jyl basynan beri qalada kámelet jasyna tolmaǵan balalarǵa jasalǵan zorlyq kórsetkishi 28,5 paıyzǵa tómendegen. Sonymen qatar, sońǵy úsh jylda balalarǵa qarsy jasalǵan qylmystar 18 paıyzǵa azaıǵan.
