Almaty polıtsııasy "Qalqaman" yqshamaýdanynda eki azamatty atyp ketken qylmystyq topty quryqtady

Bul jaıynda Almaty qalasy ІІD-niń bastyǵy general-maıor Erlan Turǵymbaev arnaıy ótken baspasóz máslıhatynda málim etti.

Esterińizde salsaq, naýryzdyń 30-y kúni "Qalqaman" yqshamaýdanynda atys bolyp, eki adam mert bolǵan edi. E.Turǵymbaevtyń aıtýynsha, tártip saqshylary sońǵy 4-5 kúnde kúdiktilerdiń izine túsip, olardyń 3-shi yqshamaýdanda páter jaldap turyp jatqanyn jáne qarýlary bar ekendigin anyqtaǵan.

"Sáýirdiń 4-i kúni saǵat segizderde QR ІІM-niń "Suńqar" arnaýly bólimshesi jaýyngerleriniń qatysýymen Áýezov aýdanyna qarasty bir úıden atalǵan qylmystyq topty quryqtaý operatsııasy júrgizildi. Operatsııa barysynda qylmyskerler qarsylyq kórsetip, qarý qoldandy. Nátıjesinde ekeýi mert bolyp, úshinshisi ustaldy. "Suńqar" jaýyngerleriniń úsheýi jaraqat alyp, qazirgi ýaqyttta em qabyldap jatyr", -deıdi ІІD-niń bastyǵy.

Sonymen qatar ol qylmyskerler jasyrynǵan úıdiń eshbir turǵyny zardap shekpegendigin, operatsııaǵa óte joǵary daıyndyqta barǵandyqtaryn aıtyp ótti.

"Atalǵan qylmystyq toptyń basqa da aýyr qylmystarǵa qatysy bary anyqtaldy. 2009 jyly olar Almaty qalasynda ýchaskelik ınspektor Dáýlet Qasymovty jumys ornynda atyp ketken, sondaı-aq osy jyldyń 17 aqpanynda Aleksandr Bodrov degen emshini óltirgen. Qazir olardyń basqa da qylmystarǵa qatysy bar-joqtyǵy anyqtalýda",-dep atap ótti óz sózinde Erlan Turǵymbaev.

Bul qylmystyq topty Qaraqalpaqstannan kelgen 1975 jylǵy Rýzımbaı Ishımbetov basqarǵan, sonymen qatar Qadyrov jáne Nııazov syndy nókerleri bolǵan.

Tártip saqshylary qylmystyq topty quryqtaý kezinde kóptegen qarý-jaraq pen polıtsııa qyzmetkerlerine tıesili kýálik pen kıim-keshekter tárkilegen. Atalǵan qylmystyq toptyń daıyndyǵy óte joǵary bolǵan, olar tipten uıaly telefondy paıdalanbaı, ratsııamen ǵana sóılesip otyrǵan.