Almaty polıtsııasy qalanyń iri kóńil kóterý oryndarynda keńeıtilgen tekserý júrgizdi

Eń aldymen esirtkimen kúresýshiler nazaryna demalys kúnderi jastar kóp jınalatyn túngi klýbtar ilikti. «Biz apta saıyn esirtki qoldanýshylar men taratýshylardy anyqtaý maqsatynda qalanyń iri kóńil kóterý oryndarynda tekserý júrgizip otyramyz. Olardyń arasynda sol jerdiń kúzetshileriniń de esirtki qoldanatyndary bolady. Tekserý jumystaryna biz ákimdik qyzmetkerleri, «Nur Otan» HDP jastar qanatynyń ókilderi, sondaı-aq, saǵat 23:00-ten keıin túngi klýbta júretin jasóspirimderdi anyqtaý úshin kámeletke tolmaǵandar isi ınspektorlaryn da qatystyryp otyrmyz», - dedi Almaty qalalyq ІІD Esirtki bıznesimen kúres jónindegi basqarma bastyǵy, polıtsııa maıory Denıs Loskýtov.

Jedel izdestirýshiler «Arlan» jáne «Búrkit» arnaıy iz kesýshileriniń kómegimen bir túnde 12 kóńil kóterý ǵımaratyn tekserdi. Polıtseıler negizinen kelýshilermen birge, kóbine esirtki saýdalaýshy bop shyǵatyn sol jerdiń qyzmetkerlerin de jiti qadaǵalaýda ustady. Mekemeniń kúdik týdyrǵan qyzmetkerleri medıtsınalyq kýálandyrýǵa jetkizildi. Mekemelerdiń birinde tańǵa jýyq esirtkiniń býynda júrgen bir kelýshi ustaldy. Tekserý barysynda onyń shalbarynyń qaltasynan esirtki untaǵy oralǵan túıinshek shyqty. Ol óz ortalarynda «Krıstall» dep atalatyn óte qatty áser etetin esirtki túri bolyp tabylady.

«Ol úshin klýb ákimshiligi óz mekemesinde esirtki paıdalanýǵa jol bergeni úshin jaýapqa tartylatyn bolady. Keıbir zańnamalyq aktilerdegi tolyqtyrýlarǵa saı, osy esirtki bıznesine qatysy bar degen barlyq músheler qylmystyq jaýapkershilikke tartylady. Sonyń ishinde, esirtki tabylǵan túngi klýbtardyń basshylary endi óz ıelikteri aýmaǵynda esirtki qoldanýǵa jol bergen tulǵalar bolyp tabylady», - dep túıindedi maıor D.Loskýtov.

Aıta keteıik, 2010 jyly Almaty qalasynyń esirtkimen kúresýshileri 100-den asa túngi kóńil kóterý oryndarynda jedel-profılaktıkalyq shara júrgizgen edi. Nátıjesinde 8 esirtki túsimi deregi anyqtaldy. Sonymen qatar, birneshe ret osy klýbtardyń kúzetshileri men dı-djeı, barmenderi taratýshylar retinde ustalǵan bolatyn.