Almaty polıtsııasy iri saýda úılerin tekserip jatyr
ALMATY. QazAqparat - Almaty polıtsııasy iri saýda oryndaryn tekserýge aldy. Atap aıtqanda, tártip saqshylary urlanǵan telefondardy saýdalaǵandardy anyqtaýǵa kiristi, dep habarlaıdy QazAqparat tilshisi.
Qalanyń Medeý aýdanyndaǵy «TsÝM», «Megataý», «GÝM», «Mobıla» jáne «Tastaq» saýda oryndarynda satylyp turǵan 500 uıaly telefon tekserildi. Onyń 15-i urlanǵan bolyp shyqty.
«Bul reıd sharalary bótenniń múlkine qol salý qylmystarynyń jolyn kesýge baǵyttalǵan. Onyń ishinde telefon urlaıtyn, urlanǵan múlikti satyp alatyn adamdardy anyqtaý úshin jasalyp jatyr. Urlanǵan telefondardyń barlyǵy tárkilenip, is materıaldaryna zattyq aıǵaq retinde tirkeldi. Urlanǵan dúnıeni saýdalaýmen aınalysqan adamdar Qazaqstan zańnamasy boıynsha jaýap beredi», - dedi qalalyq Polıtsııa departamentiniń Qylmystyq polıtsııa basqarmasynyń basshysy Esen Ysqaqov.
Aıta ketý kerek, 6 qarashada polıtsııa 33 jastaǵy Almaty turǵynynyń úıinen 184 uıaly telefon, 154 noýtbýk, 10 netbýk, 7 teledıdar, 29 vıdeo jáne fotoapparat, 1 proektor, 6 erler sómkesi, 8 qundyz ton, 6 qol saǵat, 26 noýtbýk sómkesi, 80 telefon qaby, 15 qýattaǵysh qural tapqan bolatyn.
Ol urylardyń ákelgen zattaryn arzanǵa alyp, basqalarǵa qymbat baǵamen satyp otyrǵan.
Al 22 qazan kúni Almatyda arnaıy profılaktıkalyq is-shara bastaldy. Aptalyq barysynda urlanǵan zattardy qabyldap, odan ári satýmen aınalysatyn qylmyskerler ustalyp jatyr.
Jaqynda káriz qudyqtarynyń shoıyn qaqpaqtaryn qabyldap kelgen áıel ustalǵan edi.
Munyń aldynda Almaty polıtsııasy avtobólshekterdi urlaýdy kásipke aınaldyrǵan ákki urylardyń sýretin qoǵamdyq oryndarǵa ilgen bolatyn.
Sonymen qatar, polıtsııa basqa da zańsyzdyqtardyń aldyn alý úshin vıdeo men foto salynǵan ınternet-pablıkterdi baqylaıtyn arnaıy jumys tobyn qurdy.
