Almaty polıtsııasy ınternet alaıaqtarmen qalaı kúresýde
«Ótken jyly áleýmettik jeliler men tanymal saýda alańdary arqyly azamattardy aldaǵan 97 ınternet alaıaǵy ustaldy. Alaıaqtyqtyń aldyn alý máselesinde adamdardyń aqparattyq saýattylyǵy men qyraǵylyǵy mańyzdy. Sebebi jeke múliktiń qorǵalýyna eń aldymen, olar ózderi kepil bola alady. Іs júzinde, ókinishke oraı, biz ınternette saýda jasaý mádenıetiniń múldem joqtyǵyn kóremiz.
Pandemııanyń bastalýymen kóptegen turǵyn úı jáne turmystyq máselelerdi sheshý onlaın deńgeıge kóshti. Bul faktor, jeńil aqshaǵa áýesterge «paıdasyn» tıgizdi», - dedi Almaty qalalyq polıtsııa departamenti krımınaldyq polıtsııa basqarmasynyń bastyǵy Qýatbek Naýatov.
Spıkerdiń aıtýynsha, ınternet-alaıaqtyqtyń negizgi túrleri kórsetilip, azamattarǵa ózderin qorǵaý joldary usynylǵan áleýmettik rolıkter birer aı buryn ázirlenip, keńinen taratyldy.
«Sonymen qatar, jelilerge monıtorıng júrgizilýde. Anyqtalǵan alaıaqtyq saıttar men siltemelerdiń tizimderi apta saıyn buǵattaý úshin ári qaraı jiberiledi. 2021 jyly bizdiń bastamamyz boıynsha áleýmettik jeliler men alańdardaǵy 477 saıt pen alaıaqtyq paraqshalar buǵattaldy», - dedi podpolkovnık Qýatbek Naýatov.