Almaty polıtsııasy esirtki satýshydan geroınniń iri partııasyn tárkiledi
ALMATY. QazAqparat- Almaty polıtsııasy esirtki satýshydan geroınniń iri partııasyn tárkiledi. Bul týraly búgin Almaty ІІD baspasóz qyzmeti habarlady.
Tárkilengen esirtkiniń jalpy salmaǵy 5 kılogramm 118 gramm bolǵan.
Polıtsııa qyzmetkerleriniń aıtýlarynsha, esirtki satýshynyń syrtynan uzaq ýaqyt jasyryn baqylaý júrgizilipti. Kelip túsken shuǵyl aqparatty muqııat tekserilgen.
«A. esimdi azamattyń júris-turysynyń ózi kúdik týdyrdy. Óıtkeni ol buǵan deıin de esirtkige qatysty qylmystaryna baılanysty talaı ret sottalǵan edi. Bul adam jazasyn ótep shyqqannan keıin, ókinishke qaraı durys jolǵa túspedi. Burynǵy ádetine qaıta basty. Onyń ústine ózi esirtki qabyldaıdy. Ustalýǵa qatysty aıtatyn bolsaq, ony keshe 21 sáýir kúni tústen keıin saǵat 15:00 shamasynda Túrkisib aýdanyndaǵy Kassın kóshesinde ornalasqan úıinde klıentke 1,5 gramm geroın satyp turǵan jerinen qolǵa túsirdik. Odan basqa, jedel-tergeý toby arnaıy úıretilgen ıttiń kómegimen ishine untaq tárizdi zat salynǵan birneshe polıetılendi túıinshekti tapty. Keıin sot-hımııalyq saraptama onyń geroın ekendigin anyqtady», - dedi Almaty ІІD esirtki bıznesimen kúres basqarmasynyń bastyǵy Azamat Sadyrov.
Onyń aıtýynsha, qolǵa túsken azamat esirtki salynǵan túıinshekterdi kereýettiń, ashanadaǵy ydys-aıaq jýatyn shuńǵylshanyń astyna jáne úı mańyndaǵy saraıǵa jasyrǵan eken. Ol bul úıde azamattyq jubaıymen turyp kelgen.
«5 kılogramnan asatyn geroın - bul asa iri kólemdegi esirtki bolyp tabylady jáne mundaı áreket QR Qylmystyq Kodeksiniń 4-bóliminiń 259-baby boıynsha retteledi, - dedi Azamat Sadyrov. - Biz endi birinshi kezekte bul esirtkiniń kelý jolyn jáne qatysýshylardy anyqtaýymyz kerek. Sol úshin ustalǵan adamnyń qarym-qatynas jasap júrgen adamdary tekseriledi. Sondaı-aq osy esirtkini satyp alyp júrgen tutynýshylardy da anyqtamaq nıettemiz».
