Almaty polıtsııasy elimizde zańsyz júrgen 177 sheteldikti ustady
ALMATY. QazAqparat- Almatyda zańsyz júrgen sheteldikterdi anyqtaýǵa arnalǵan «Zańsyz kelimsek-2019» jalpyulttyq jedel aldyn alý sharasy bastaldy, dep habarlaıdy QazAqparat tilshisi.
Almatyda jedel aldyn alý sharasy bastaldy. Aktsııa megapolıste zańsyz júrgen adamdardy anyqtaýǵa jáne zańsyz kóshi-qon arnalaryn toqtatýǵa baǵyttalǵan. Іzdestirý jumystary 9 qyrkúıekten 12 qyrkúıekke deıin jalǵasady.
«Reıdtiń alǵashqy kúninde QR kóshi-qon zańnamasyn buzǵan 235 adam anyqtalyp, jaýapqa tartyldy. Onyń 177-si - shetel azamattary. 46 adamnyń elde júrip-turý merzimi qysqartyldy. 54 azamat sot sheshimimen elden shyǵaryldy. Qabyldaý jáne taratý ortalyǵyna qujaty joq 64 sheteldik ornalastyryldy. Sheteldikterdiń Qazaqstanda júrip-turý zańdylyǵyn qamtamasyz etpegeni úshin 46 qazaqstandyq ákimshilik jaýapkershilikke tartyldy. Sonymen birge, 12 jumys berýshi sheteldik jumys kúshin tartý erejelerin buzǵany úshin jaýap beredi», - deıdi Almaty qalalyq polıtsııa departamentiniń kóshi-qon qyzmetiniń bastyǵy Ashat Býtýnchınov.
