Almaty polıtsııasy densaýlyq saqtaý salasynda «qyzmet kórsetýshi» alaıaqty quryqtady
ALMATY. Tamyzdyń 5-i. QazAqparat /Erbol Azanbek/ -Almatylyq polıtsııa aýyr naýqastar men jedel ota jasaýdy qajetsinetinderge «kómek kórsetýshi» alaıaqty qolǵa túsirdi,
dep habarlaıdy qalalyq ІІD-niń baspasóz qyzmeti.
Qolǵa túsken azamatsha densaýlyq saqtaý salasynda óziniń tanystary barlyǵyn aıyp, «kómek» qyzmetin usynǵan. Óz qyzmetin ol aýrýdyń aýyr, jeńildigine qaraı baǵalap otyrǵan.
«Sońǵy jábirlenýshiden nevrologııa boıynsha ota jasaýǵa kómektesetinin aıtyp, 120 myń teńge, 3 altyn buıymyn alǵan. Alaıaq aıǵaqty zattarmen qolǵa tústi. Ony ustaý sharasy aýrýhanalardyń birinde júzege asyryldy», deıdi Áýezov aýdandyq ІІB-nyń bastyǵy Ábilǵazy Tólepbergenov. 39 jasar kúdikti buǵan deıin alaıaqtyǵy úshin 3 ret sottalǵan bolyp shyqty. «Ustalǵan áıeldiń ózi qylmystyq jolmen jan baǵyp júrgenin moıyndap otyr. Tekserý kezinde ol Medeý aýdany aýmaǵynda osyǵan uqsas taǵy bir qylmysty jasaǵanyn aıtqan. Qazirgi tańda onyń basqa da qylmystarǵa qatystylyǵy anyqtalýda», deıdi Á.Tólepbergenov. Onyń aıtýynsha, ustalǵan azamatsha Almatyǵa Jambyl oblysynyń Qordaı aýdanynan kelgen. Onyń ata-anasynyń baǵýynda 2 jas balasy bar kórinedi.
