Almaty polıtsııasy bıznes ortalyqty tonaǵan urylardy ustady
ALMATY. QazAqparat - Almaty polıtsııasy Almaly aýdanyndaǵy eki bıznes ortalyqty tonaǵan urylardy ustady, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, qylmystyq toptyń 4 múshesi, Shyǵys Qazaqstan oblysynyń týmalary eken.
Olardyń árqaısysy buǵan deıin páter tonap, qylmystyq jaýapkershilikke tartylǵan bolyp shyqty.
«Bul joly olar baǵytyn ózgertip, shaǵyn kompanııalardyń keńselerine aýyz sala bastaǵan. Ózderiniń aram oılaryn júzege asyrý úshin kúdiktiler keńselerge qarapaıym klıent retinde kelip júrgen. Osylaısha olar kameralardyń ornalasýyn, qaýipsizdik sharalaryn, qyzmetkerlerdiń jumys kestesin bilip ketýge tyrysqan», - dedi qalalyq ІІD krımınaldyq polıtsııa basqarmasynyń basshysy Janbolat Zıadın.
Onyń aıtýynsha, qazirgi tańda kúdiktilerden 2 avtokólik, 45 myń AQSh dollary kóleminde aqsha tárkilengen.
Búginde bul adamdardyń 16 tonaýshylyq qylmysyna qatysy bary anyqtaldy.
Qylmystyq toptyń basqa da músheleri izdestirilip jatyr.
Aıta ketý kerek, 20 shilde kúni Almaly aýdanyndaǵy bıznes ortalyqtardyń jalǵa alýshylarynan polıtsııaǵa aryz túsken bolatyn. Urylar birmezgilde 4-9 qabat aralyǵyndaǵy keńselerdiń seıfterin tonap ketkeni belgili boldy.
