Almaty polıtsııasy beınebaqylaý kameralaryn urlamaq bolǵan kúdiktilerdi ustady (FOTO)
ALMATY. QazAqparat- Almaty polıtsııasy qalada «Qaýipsiz aýla» baǵdarlamasy boıynsha ornatylǵan beınebaqylaý kameralaryn urlamaq bolǵan kúdiktilerdi ustady. Bul týraly búgin Almaty qalasy ІІD baspasóz qyzmetinen habarlady.
Qaskúnemder tańǵy saǵat tórt shamasynda «Orbıta-3» yqsham aýdanyndaǵy 16-shy úıdiń birneshe kireberisinde ornatylǵan beınebaqylaý kameralaryn urlamaq bolǵan.
«Olar kameralardy burap ala bastaǵan. Al keıbireýin tipti kúshpen julyp alǵan. Osylaısha qatty dybystan keıbir turǵyndar oıanyp ketedi. Sóıtip, olardan «102» pýltine der kezinde habar kelip tústi. Úsh mınýttyń ishinde oqıǵa ornyna «Boran-064» jáne «Boran-056» jol-patrýldik polıtsııasynyń eki ekıpajy kelip jetti. Inspektorlardy kórgen zamat, kúdiktiler qashyp ketpekke áreket jasaıdy. Biraq, ekeýi de qylmys ústinde ustaldy. Tekserý barysynda kúdiktilerden 4 beınebaqylaý kamerasy tabylyp, tárkilendi. Olar qylmystyq istiń materıaldaryna bultartpaıtyn zattaı aıǵaq retinde qosa tirkeldi», - dedi Bostandyq aýdandy ІІB bastyǵy, polıtsııa podpolkovnıgi Berik Ábilbekov.
Al ustalǵandar bul qylmysqa tek paıda tabý úshin barǵandaryn aıtty. Belgili bolǵanyndaı, jas azamattar urlanǵan zattardy satyp, aqsha tappaq bolǵan.
«Qaladaǵy turǵyn úılerge beınebaqylaý kameralaryn ornatý tıimdi ekendigin kórsetip otyr. Eń birinshi kezekte múliktik qylmystardyń aldyn alýda tıimdiligi aıqyn. Ekinshiden, quqyqqa qaıshy áreketterdi ashýda kómegi orasan zor. Búgingi tańda, «Qaýipsiz aýla» baǵdarlamasy boıynsha Almaty qalasynda 3 myńnan asa turǵyn úı ornalasqan 2 myńnan astam aýlaǵa 15 myńǵa jýyq beınebaqylaý kameralary ornatyldy. Turǵyn úılerdi osyndaı tehnıkalyq qurylǵylarmen jabdyqtaý jumystary sońǵy eki jyl kóleminde josparly túrde júzege asyrylyp keledi. Bul jumystar aldaǵy ýaqytta da jalǵasyn tabatyn bolady. Taǵy da aıta keteıin, beınebaqylaý kameralaryn qasaqana urlaǵan nemese isten shyǵarǵandar aǵymdaǵy zanamaǵa sáıkes, jaýapkershilikke tartylady. Al ustalǵan kúdiktilerdiń isine QR Qylmystyq Kodekstiń 188-shi babynyń normalary boıynsha baǵa beriledi. Qazir sotqa deıingi tergeý amaldary júrgizilýde» - dedi óz kezeginde Almaty q. ІІD Ákimshilik polıtsııa basqarmasynyń bastyǵy, polıtsııa polkovnıgi Nurlan Almasbekov.
