Almaty polıtsııasy balalardy kirgizgen túngi klýb ıelerin jaýapqa tartty
ALMATY. QazAqparat - Almatynyń jergilikti polıtsııa qyzmeti balalardy túngi ýaqytta kirgizgen oıyn-saýyq jáne kompıýterlik klýb ıelerin jaýapqa tartty. Bul týraly qalalyq ІІD-niń baspasóz qyzmeti habarlady.
Bul boıynsha QR ÁqK 422 babymen jaýapkershilik qarastyrylǵan. Zańǵa sáıkes kámeletke tolmaǵan jasóspirimder túngi 23.00-den keıin ata-anasynyń ilesip júrýinsiz kóńil kóterý nemese kompıýterlik klýbtarda bolmaýy tıis.
«Ásirese mekteptegi demalys kezinde ata-analar balalaryn qatań qadaǵalaýǵa alýy kerek. Kóp jaǵdaıda jasóspirimder qylmys qurbany bolyp nemese qylmysqa baryp jatady. Balalardyń túngi ýaqytta kirgeni úshin mekeme ákimshiligi de jaýapsyz qalmaıdy. Ákimshilik birinshi kezekte tulǵanyń jasyn, qujatyn suraýy kerek», - dedi qalalyq ІІD jergilikti polıtsııa qyzmetiniń ıývenaldy basqarmasynyń basshysy Leıla Álipbaeva.
Polıtsııa jyl basynan beri zańdy oryndamaǵan 17 mekeme basshysyn jaýapqa tartty. Sondaı-aq, balasyn qańǵyrtyp qoıǵan 470 ata-ana ákimshilik jaza aldy.
Qazir atalǵan ister mamandandyrylǵan aýdanaralyq jasóspirimder isi boıynsha sotqa jiberildi.
