Almaty polıtsııasy azamattardyń kómegimen quqyq buzýshylyqqa qatysty ákimshilik yqpal etý sharasyn qoldandy

Bul týraly búgin Almaty qalalyq ІІD baspasóz qyzmetinen habarlady.

Kólik quraldaryn múmkindigi shekteýli jandarǵa arnalǵan kólik qoıý oryndaryna qoıý erejesiniń buzylǵandyǵy týraly fotoaqparat polıtsııa bóliminiń qaramaǵyna áleýmettik jeliler arqyly kelip tústi. Tártip saqshylary tez arada tekserý júrgizdi.

«Bul fotoda eki avtokólik beınelengen. Olardyń biri - «Aýdı» markaly avtokóligi zańdy tulǵaǵa tıesili bolyp shyqty. Bul avtokóliktiń ıesi tekserý barysynda óziniń ekinshi toptaǵy múgedek ekendigin rastaıtyn qujattar usyndy. Sáıkesinshe, onyń is-áreketinde quqyqqa qaıshy nyshandar tabylmady. Degenmen, basqa kólik - «Mersedes» avtokóliginiń júrgizýshisi quqyqqa qaıshy áreket jasaǵanyn moıyndady. Oǵan qatysty QR Ákimshilik quqyq buzýshylyq Kodeksiniń 597-shi babynyń 4-shi tarmaǵynda qarastyrylǵan quqyq buzýshylyq áreketterdiń nyshany boıynsha ákimshilik hattama toltyryldy», - dedi Almaty qalalyq ІІD Jergilikti polıtsııa qyzmetiniń bastyǵy, polıtsııa podpolkovnıgi Jasulan Baıkenov.  

Óz kezeginde Almaty polıtsııasy quqyqtyq tártiptiń saqtalýyna atsalysqan belsendi azamattarǵa rızashylyǵyn bildirdi.