Almaty polıtsııasy aıyppul tólemegen júrgizýshilerdi ustaı bastady
ALMATY. QazAqparat - Almaty polıtsııasy aıyppul tólemegen júrgizýshilerdi ustaı bastady, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, qalada «Boryshker» jedel profılaktıkalyq aptalyǵy bastaldy. Kólik kóp júretin joldarda «KRIS-P», «POTOK-M» mobıldi keshenderi men jol-patrýldi polıtsııa ekıpajdary shoǵyrlanǵan. Bul quraldar ákimshilik qaryzy bar júrgizýshilerdi ustaýǵa arnalǵan.
«Josparly shara qamaýda turǵan kólik ıeleri men aıyppul tólemeı otyrǵan júrgizýshilerdi ustaýǵa baǵyttalǵan. Avtomatty júıe kólik aǵynynan sondaı júrgizýshilerdi anyqtaǵan soń, olardy jol polıtsııasy toqtatady. Keıin ol azamatqa monıtordan boryshy týraly aqparat kórsetiledi. Kólik aıyp turaǵyna jiberiledi. Qajetti hattama toltyrylady. Júrgizýshi ony barlyq boryshynan qutylǵan soń ǵana shyǵara alady. Mundaı sharalar azamattardy ákimshilik boryshyn ýaqytynda tóleýge májbúrlemek», - dedi ІІD basqarma basshysy Jandos Muratalıev.
Aıta ketý kerek, aýqymdy sharaǵa aımaqtyq jeke sot oryndaýshylar men prokýratýra ókilderi qatysyp jatyr.
