Almaty polıtsııasy avtobýs júrgizýshilerin qatań baqylaýǵa aldy
Almaty qalalyq Polıtsııa departamentiniń málimetinshe, 4-13 qazan aralyǵynda 184 patrýldik ekıpaj jáne 911 polıtsııa qyzmetkeri jolaýshylar kóligin tekseretin bolady.
«Bul shara jolaýshylar tasymaldaıtyn qoǵamdyq kólik júrgizýshileriniń jol qozǵalysy erejelerin buzýyn anyqtaý men jolyn kesýge, sondaı-aq avtobýstardyń tehnıkalyq jaǵdaıyn tekserýge baǵyttalǵan. Júrgizýshilerdiń kóliktik tártibin jaqsartý, tehnıkalyq aqaýy bar nemese qaıta jabdyqtalǵan jolaýshylar kóliginiń qoldanysta júrý faktilerin anyqtaý jáne zańsyz jolaýshylar tasymalynyń jolyn kesý», - deıdi jergilikti polıtsııa qyzmeti basqarmasynyń bastyǵy Manap Sattarov.
Іs-sharanyń birinshi kúninde 46 ákimshilik quqyq buzýshylyq anyqtaldy: 29 júrgizýshi manevr jasaý erejelerin buzsa (QR ÁQbK-niń 595-baby), 12-si kólik júrgizý kezinde telefon paıdalanǵan (QR ÁQbK-niń 591-baby). Mamandandyrylǵan aıyp turaǵyna 1 qoǵamdyq kólik qoıyldy. Ruqsat etilmegen 6 qoǵamdyq kólik pen taksı aıaldamasy joıyldy.
Onyń aıtýynsha, reıd joldardaǵy apatty jaǵdaılardyń aldyn alýǵa kómektesedi.
«Jolaýshylar kóligindegi jazataıym oqıǵalardyń taldaýy kórsetkendeı, jol-kólik oqıǵalarynyń negizgi sebepteri júrgizýshilerdiń Jol qozǵalysy erejeleriniń talaptaryn saqtamaýy, atap aıtqanda, belgilengen jyldamdyqty asyrýy, qarsy jolaqqa shyǵýy jáne qashyqtyqty saqtamaýy», - deıdi polıtsııa ókili.
