Almaty polıtsııasy avtobýs jolaǵynyń ashyqtyǵyn tekserýdi kúsheıtetin boldy
ALMATY. QazAqparat - Almaty polıtsııasy avtobýs jolaǵynyń ashyqtyǵyn tekserýdi kúsheıtetin boldy, dep habarlaıdy QazAqparat tilshisi.
Qalalyq ákimdiktiń baspasóz qyzmeti habarlaǵandaı, búgin Tóle bı kóshesinde №201 baǵyttaǵy 18 metrlik avtobýstar keptelip qalǵan bolatyn. Jeke kólik júrgizýshileri avtobýs jolaǵyna kólikterin qaldyryp ketken. Sonyń kesirinen qoǵamdyq kólikter júre almaı jınalyp qaldy.
Dıspetcherlerge ýaqytyly habarlanbaǵan soń avtobýs qozǵalysynyń jıiligi buzylǵan.
Tek 1 saǵattan asqan soń ǵana jol júrý kestesi qalpyna keltirildi.
Qalalyq ákimdik mundaı jaǵdaılardy boldyrmaý maqsatynda qoǵamdyq kólik joldarynda reıd jumystaryn jıi júrgizýdi qolǵa aldy.
Jolaýshylardan shaǵym túsken jaǵdaıda «Almatyelektrotrans» JShS olardyń shyǵyndaryn tolyq ótep beredi.
Aıta ketý kerek, áleýmettik jelide búgin №201 avtobýstardyń Tóle bı kóshesimen Tastaq kóshesine deıin ǵana baryp, adamdardy túsirip jatqany týrly vıdeo jarııalandy. Almatylyqtardyń kópshiligi bul áreketti júrgizýshilerdiń ereýili dep tuspaldaǵan.
«Almatyelektrotrans» kompanııasy keptelistiń ne sebepti bolǵanyn túsindirdi.
«Eshqandaı ereýil bolǵan joq. Avtobýs jolaǵynda jeke kólikterdiń kóptigine baılanysty 18 metrlik uzyn avtobýstar bir jerge jınalyp qalǵan. 40 mınýt ishinde jol polıtsııasy joldaǵy kólikterdiń barlyǵyn evakýatormen alyp ketti. Qoǵamdyq kólik óz kestesimen júrip jatyr», - dedi Rızvan Tsınaev.
