Almaty polıtsııasy aryz qabyldaý ýaqytyn 15 mınýtqa qysqartty

ALMATY. QazAqparat - Aýdandyq basqarmalardyń jumysyna servıs júıesiniń engizilýine baılanysty azamattardyń aryzy 15 mınýtta qabyldanatyn boldy, dep habarlaıdy QazAqparat tilshisi.

Búginde qala turǵyndary aryzdaryn front ofısterge ótkize alady. 

Olardyń pikirinshe, bul adamdardyń ýaqytyn únemdep, qaǵazbastylyqtan qutqarady.

«Bul júıe arqyly kez kelgen aýdanda otyryp, qalanyń basqa aýdandyq bólimshelerine aryzdanýǵa bolady. Sonymen qatar, azamattardy qabyldaý ýaqyty úsh esege qysqardy. Halyq tarapynan narazy pikirler de azaıyp keledi», - dedi Almaty Polıtsııa departamenti basqarmasy basshysynyń orynbasary Erjan Orazbekov.

Almaty polıtsııasy Jumyspen qamtý ortalyǵymen aýdandyq bólimshelerde azamattardy qabyldaýǵa zań fakýltetteriniń stýdentterin bólý týraly kelisimge kelmek.

Bul bolashaqta jastardyń quqyq qorǵaý organdaryna qabyldanýyna septigin tıgizbek.

Jańa formattaǵy qabyldaý bólimderinde keńesshi qyzmetin basqarmanyń jaýapty qyzmetkerleri men ishki ister organdarynyń ardagerleri aınalysady.