Almaty polıtsııasy arnaıy zerthanadan 100 keli sıntetıkalyq esirtki tárkiledi
Óndiris Almatynyń Alataý aýdanyndaǵy jeke úılerdiń birinde ornalasqan. Onda 32 jastaǵy er adam jumys istedi. Ol – «hımık», oraýysh jáne kóterme saýdamen aınalysatyn adamnyń qyzmetterin atqardy.
«Jedel ádispen alynǵan aqparat muqııat tekserildi jáne rastaldy. Birneshe aı boıy «óndirýshi» zerthana jumysyn rettep, onda sıntetıkalyq mefedron preparatyn jasady. Belgili bolǵandaı, B. esimdi azamat jumys berýshiniń jelidegi onlaın nusqaýlaryn oryndady. Kýrator oǵan qajetti shıkizattyń jetkizilýin qamtamasyz ete otyryp, zerthanalyq jumystardy úıretti. Hımık-esirtki satýshy qosalqy bólmesi bar jeke úıdi jalǵa aldy: esirtki zerthanasyn qoraǵa ornalastyrdy, bas ǵımaratta ózi turdy. Kúdikti qylmystyq usynysqa jomart eńbekaqynyń arqasynda qyzyǵýshylyq tanytqanyn aıtady», – dedi Almaty qalalyq Polıtsııa departamenti bastyǵynyń orynbasary Dıdar Ahanov.
Esirtki satýshy arnaıy is-shara barysynda ustaldy. Esirtki zerthanasy joıyldy. Tintý kezinde ol jerden prekýrsorlar, shıkizat, satýǵa daıyn sıntetıkalyq esirtki jáne shyny ydystar túrindegi ınventar, suıyqtyqtary bar polıetılen kanıstrler, probırkalar, bótelkeler, tarazylar men elektr peshteri tabyldy.
«Tárkilengen shıkizattyń jalpy salmaǵy 100 kelini qurady. Kúdikti ýaqytsha ustaý ızolıatoryna qamaldy. Atalǵan derek QR QK-niń 297-baby 3-bóliginde kózdelgen qylmys belgileri boıynsha sotqa deıingi tergeýdiń biryńǵaı tizilimine tirkeldi. Eske salaıyq, buǵan deıin EQQKB qyzmetkerleri qylmystyq bıznestiń sybaılastarynyń biri 33 jastaǵy S.esimdi azamatty ustaǵan bolatyn. Onyń kóliginen 85 býma mefedron jáne marıhýana tabylyp, tárkilendi. Anyqtalǵandaı, sıntetıkalyq esirtkini kúdiktiniń ózi jasaıdy. Osy maqsatta ol Almaty oblysy Tuzdybastaý aýylynda jeke turǵyn úıdi jalǵa alǵan. Ruqsat etilgen tintý kezinde jalǵa alynǵan turǵyn úıden zerthanalyq qural-jabdyqtar men 15 keliden astam sıntetıkalyq esirtki tabyldy jáne tárkilendi», – dedi Ahanov.
Sondaı-aq spıker qazirgi ýaqytta qylmystyq salanyń basqa da baılanystaryn ornatýǵa baǵyttalǵan jedel is-sharalar júrgizilip jatqanyn aıtyp ótti.
Foto: polisia.kz
