Almaty polıtsııasy alaıaqtyq áreketter jasaǵan qylmystyq topty áshkereledi
ALMATY. QazAqparat - Almaty polıtsııasy alaıaqtyq áreketter jasaǵan qylmystyq topty áshkereledi. Bul týraly búgin Almaty qalalyq ІІD baspasóz qyzmetinen habarlady.
Qylmystyq toptyń quramynda 1993, 1981, 1986 jáne 1992 jyly týǵan tórt er azamat bolǵan. Aldyn ala málim bolǵanyndaı, qylmystyq áreketterdi Ózbekstan Respýblıkasynda týyp-ósken jáne Reseı Federatsııasynyń azamaty bolyp tabylatyn 23 jastaǵy T. esimdi azamat uıymdastyrǵan.
«Jedel sharalardy júrgizý barysynda, bul azamattyń uıymdastyrýshy bolǵandyǵy anyqtaldy. Ol erte bastan polıtsııa qyzmetkeriniń jalǵan qyzmettik kýáligin ázirlep, polıtsııa kıimin satyp alǵan. Al onyń sybaılasy 35 jastaǵy M. esimdi azamat, bizdiń jedel anyqtalǵan derekterge sáıkes, polıtsııa mekemelerindegi operatıvtik qyzmetker rólin oınaǵan.
Qylmystyq toptyń taǵy bir múshesi - 30 jastaǵy M. esimdi azamat polıtsııa qyzmetkeri jáne júrgizýshi rólin oınaǵan. Al ustalý barysynda polıtsııa kıimin kıingen, polıtsııa aǵa leıtenanty pogonyn taǵynǵan azamat ózin ishki ister organynyń tergeýshisi retinde tanystyryp júrgen. Tórt kúdikti de kúndizgi saǵat 11. shamasynda Bostandyq aýdanynda ornalasqan saýda úıleriniń biriniń mańynan ustaldy», - dedi Almaty qalalyq ІІD Uıymdasqan qylmysqa qarsy kúres basqarmasynyń bastyǵy, polıtsııa polkovnıgi Erlan Oralbaev.
Operatıvtik bólimdegiler sondaı-aq, alaıaqtyq áreketterdiń aldyn ala syzbasyn túsindirdi. Ony alaıaqtar birneshe kún boıy muqııat daıyndaıtyn bolǵan. Polıtsııanyń jedel derekterine sáıkes, alaıaqtar aldymen belgili bir jaǵdaılarǵa baılanysty aqshaǵa muqtaj, jolsyzben júre beretin qymbat avtokólikteri bar azamattardy izdep tabatyn bolǵan.
«Budan keıin, qylmyskerler ózderiniń tanystarynyń arasynan jeke adamdarǵa qaryzǵa aqsha berip paıda tabatyn adamdy izdep tabady. Biraq, mindetti túrde jańaǵy qymbat kólik kepildikke alynady. Birshama ýaqyt ótken soń, dál qaryz aqshany qaıtaratyn kúnnen bir kún buryn, deldal bolyp júrgen alaıaqtar eki tarapty da kezdestiredi. Sol kezdesken jerde naǵyz spektal oınalatyn bolǵan: Kezdesý ornyna aıaq astynan beıtanys azamattar kele qalady. Arasynda bir adam polıtsııa kıimin kıingen. Olar ózderin ishki ister organdarynyń ókilderi retinde tanystyrady. Sóıtip, kepildikke alynǵan mashınanyń urlanǵandyǵy aıtylyp, tárkilenedi. Bul jerde kúdiktiler jalǵan hattamalar blankisin qoldanǵan. Aqyr sońynda, alaıaqtyq áreketterdiń nátıjesinde, qaryzǵa aqsha bergen adam da avtokóliktiń ıesi de aldanyp shyǵa keledi. Kúdiktilerdi ustaý barysynda olardyń birine tıesili «Folksvagen» avtokóliginen kisender, polıtsııa qyzmetkeriniń jalǵan kýáligi, sondaı-aq, tergeýshi hattamasynyń jalǵan blankileri tabylyp, tárkilendi», - dedi polkovnık Oralbekov.
Uıymdasqan qylmysqa qarsy kúres basqarmasyndaǵylar kúdiktiler ustalǵannan, keıin, bir kúnnen keıin operatıvtik qyzmetkerler alaıaqtyq áreketterdi uıymdastyrýshynyń ákesi - 47 jastaǵy T. esimdi azamatty ustaǵandyǵyn habarlady. Qylmystyq jolmen paıda tabý ıdeıasy soǵan tıesili eken.
Aldyn ala derekter boıynsha ońaı oljaǵa qunyqqandar qylmystyq áreketterge bıylǵy jyldyń mamyr aıynan bastap kirisken. Qazir olardyń úsh oqıǵaǵa qatysy barlyǵy anyqtaldy. Eki jaǵdaı barysynda qaskúnemder «Toıota Lend Krýzer Prado» jáne bir jaǵdaıda «Mersedes Bents-211» avtokóligin ıemdengen.
Kúdiktilerden japa shekkender bolsa myna telefondarǵa habarlasýyna bolady: Almaty qalalyq ІІD Tergeý basqarmasynyń telefondary: 254-43-80; 254-43-82 ı 254-41-57. 
