Almaty polıtsııasy alaıaqtardyń fotojýrnalyn jasady
ALMATY. QazAqparat - Almaty polıtsııasy alaıaqtardyń fotojýrnalyn jasady. Bul derekter endi áleýmettik jelilerde taratylatyn bolady, dep habarlaıdy QazAqparat tilshisi.
Qalalyq Polıtsııa departamentiniń baspasóz qyzmetiniń habarlaýynsha, qylmystyq toptamany jasaýǵa áleýmettik jelidegi halyqtyń belsendiligi yqpal etken.
«Búginde biz úshin BAQ pen áleýmettik jelini paıdalanyp osy qylmyskerlerdiń kim ekenin anyqtaý óte mańyzdy. Odan keıin olardy taýyp alyp, ustaý birneshe kúnniń enshisinde. Jobany jasamas buryn ǵalamtor jelisinde analız jasaldy. Áleýmettik jeli arqyly birqatar aýyr qylmystardyń beti ashylǵan. Keıbir azamattyq pozıtsııasy óte berik, zańǵa baǵynatyn adamdardyń buǵan yqpaly tıip jatyr. Oǵan óte qýanyshtymyz. Eger osy toptamadaǵy adamdardy tanyp jatsańyzdar 8-747-255-93-64, 8-747-255-93-73 nómirlerine habarlasýdy suraımyz», - dedi departamenttiń resmı ókili Saltanat Ázirbek.
Bul jýrnalda syrtqy beınebaqylaý kameralarynan túsirilgen vıdeo, fotolar jınaqtalǵan. 9 faılda alaıaqtardyń, qylmyskerlerdiń sulbasy, bet-júzi kórsetilgen.
Munyń aldynda Almaty polıtsııasy avtobólshekterdi urlaýdy kásipke aınaldyrǵan ákki urylardyń sýretin qoǵamdyq oryndarǵa ilgen bolatyn.
Sonymen qatar, polıtsııa basqa da zańsyzdyqtardyń aldyn alý úshin vıdeo men foto salynǵan ınternet-pablıkterdi baqylaý úshin arnaıy jumys tobyn qurdy.
