Almaty polıtsııasy aǵash kesýge jalǵan ruqsat qaǵazyn jasaǵandardy jaýapqa tartty
ALMATY. QazAqparat - Almaty qalalyq Tabıǵı resýrstar jáne tabıǵatty paıdalaný basqarmasyna qala turǵyndarynan shaǵym túsken, dep habarlaıdy QazAqparat tilshisi.
Turǵyndar Іle tasjoly 573/1 mekenjaıynda jol boıyndaǵy aǵashtardyń kesilgenin habarlaǵan.
Basqarma qyzmetkerleri men qorshaǵan ortany qorǵaý polıtsııasynyń ókilderi oqıǵa ornyna baryp, 35 túp aǵashtyń zańsyz kesilgenin anyqtady.
Atalǵan mekenjaıda ornalasqan óndiristik bazanyń ıeleri «AS Fınans tehnogrýpp» JShS jasyl-jelekti otaýǵa jalǵan qujat ázirlep, kórsetken kórinedi.
«Jalǵan qujat jasaǵandarmen Túrksib aýdandyq polıtsııasy aınalysyp jatyr. Memlekettik organnyń qujatyn qoldan jasady degen aıyppen bul derek Túrksib aýdandyq ІІB -de sotqa deıingi tergeý reestrine tirkeldi. Sonymen qatar, QR ÁqbK 386-babyn buzǵany úshin menshik ıelerine 30 AEK kóleminde aıyppul salyndy. Endi kásiporyn tabıǵatqa keltirilgen nuqsannyń ornyn toltyrý úshin 350 túp aǵash otyrǵyzýǵa mindetteldi», - dedi ákimdiktiń baspasóz qyzmetindegiler.
